6 Ikut ra i longoro i lena o Lasarus i misait, i kis melet pas ut aru bung una tamon ra i kis iai.
7 Numur o Iesu i inanos a kum nat na ususer lena, “Dat in milet melet utong una papor Judia.”
8 Ma det watungi tano lena, “Ai, Tene Ususer, un ra bung kut a kum te Juda det nem na duku doko ui, ra uniri u nem na milet melet kut utong?”
9 O Iesu i watungi lena, “Ara bung i elar nama noino ma aru du bung, niko? Ra taio i wanan una waspi ken tutuka, uni i tamtama una talapor ina rakrakon bual.
10 Ikut ra taio i wanan una mirum in tutuka, uni kalako talapor.”
11 O Iesu i watung tar a wasiso ri tandet, ra numur i lena, “A pasandat o Lasarus i sa inep dumun, ma an nan sur an wangun pasi.”
12 A kum nat na ususer det balu i lena, “Labino, ra i inep dumun kut, in langolango melet.”
13 O Iesu i wasiso una minatin o Lasarus, ikut a kum nat na ususer det nuki lena o Lasarus i inep dumun kut.
14 Ra o Iesu i watung talapori maragom tandet lena, “O Lasarus i sa mat.
15 Ma a nuknuking i kis un mot, i mo ra a gas ra ka kis tong, sur mot in nurnur. Ikut, uniri dat in nan mo toromi.”
16 O Tomas ra di watungi kai nama kasango i watungi tan a kum nat na ususer lena, “Dat in nan tomo sur dat kai dat in mat tomo nami.”
17 O Iesu i wanpat, ra i longoro i lena di sa uruk ru tar a minatin o Lasarus una kulam na minat, ma i sa wat na bung bat tari.
18 A tamon ra, o Betani, i milau i kut o Jerusalem, i elar kut nama tulu kilomita,
19 ra a susut na te Juda det wanpat torom o Mata ma o Maria sur det in kis umaut der una tisinder ra i mat.
20 O Mata i longoro i lena o Iesu kura mo i wan nanan urin, ra i pirso, i wan barato i. Ikut o Maria i kis utmakai tiro urumu.
21 O Mata i watungi tan o Iesu lena, “Labino, ra gunuk un kis ut nin, a tisinglik ken mat.
22 Ikut a tasmani lena, ra uniri un saring o God sur tu utna, in pitari kut tam.”
23 O Iesu i watungi tano lena, “O tisimlik in laun melet kut.”
24 O Mata i balu i lena, “A tasmani lena in laun melet una bung ra o God in ukatutur melet pas a taro gusun a minat.”
25 O Iesu i watungi tano lena, “Iau a nilaun melet gusun a minat, ma iau a nilaun mulus. Osi ra i nurnur un iau, ra in mat, in laun melet,
26 ma osi ra i laun ma i nurnur un iau, ken mat. Pepetlai, u nurnur ut una wasiso ri?”
27 O Mata i balu i lena, “Ma Labino, a nurnur lena ui a Karisito a Nutun o God, i ra o God i tulu ru i urin una rakrakon bual.”
28 Numur ra o Mata i sa watung tari lenri, i milet melet ma i kabo eno pas a tisino ino o Maria, ma i inanosi lena, “A Tene Ususer i sa wanpat ma i iting sur ui.”
29 O Maria i longoro i lenri, ra i pirso lakit ma i wan toromi.
30 O Iesu ke wanpat utmakai tiro utamon, i kis utmakai una nubual ra o Mata i barato pasi iai.
31 A kum te Juda ra det kis tomo nam o Maria tiro urumu sur det in umaromi, det tama i ra i pirso lakit pas gusun det unago utamon, ra det muri. Uni det nuki lena in nan sur a kulam na minat sur in domos iai.
32 O Maria i wanpat una nubual ra o Iesu i kis iai, ra i tama pasi, i kis butkeke taru numugu nisano, ma i watungi lena, “Labino, ra gunuk un kis ut nin, a tisinglik ken mat.”
33 O Iesu i tama o Maria tomo nama kum te Juda ra det wan tomo nami det domos nanan, ra i nuknuk doko una niono ma in balano i maut doko.
34 O Iesu i ting det lena, “Kura mot ubek tar a minatino awai?” Det balu i lena, “Labino, wan urin sur un tama i.”
35 Ra o Iesu i tangis.
36 A kum te Juda det watungi lena, “Mot tama i, i maris doko i!”
37 Ikut ara taro tagun det, det watungi lena, “I utamtama pas a matan a pulu, ilai ra ke ulangolango pasi kai a musano ri, sur gong i mat?”
38 In balano Iesu i maut doko, ra i wanpat nisan a kulam na minat. A kulam na minat ra, a mato kura tiro una papor wat, ma di ubek bat tari nama labino wat.
39 O Iesu i watungi tandet, “Mot in bulus ru a wat.” Ra o Mata, a tisin a musano ra i mat, i balu i lena, “Labino, i sa sangnain, uni i sa wat na bung bat tari!”
40 O Iesu i watungi tano lena, “Pepetlai, ka watung tari tam lena, ra un nurnur un tama a minamar anun o God?”
