30 Rernem tawen-they anperlarr-alhenh. Rernem Jesus-warl-athek apetyenh, renh aretyek.
31 Kwertengerl-rnem angkek, “Akalty-anthenh-anthenhay, amern arlkway!”
32 Ra angkek ikwer-rnem-warl, “Atha amern impen atnyeneyel, arrantherr iterl-arey-angenharl.”
33 Kwertengerl-rnem ayernerrenh, “Ingwerentyel apek amern akngetyek ikwer.”
34 Jesus angkek, “Ayeng amernekant iterrey-angenh. Atha warrk renh ywerrelhiletyek Akngeyek, rarl ayenh warrk anthek. Alakenh-anyem ayeng Akngeyek warrkirreyel, ayeng rlterrk anayntetyek, amern akngerr atha arlkwenty-penh-apeny.
35 Ntang weyt arrantherr iwenty lyapelhiletyek. Ikwer-penh arrantherr ileyel, ‘Anantherr alkent 4-pel-penh amern weyt renh-rnem ampeng-anem akaltheyenh.’ Amern weyt mpwelheyel, anwantherr renh akalthetyekan. Arrantherr ingkerrenh-angkwarr arenherr-arey! Akngerr mpwelheyel. Akngerr mpwelheyel, renh-rnem Akngey-warl akarriletyek.
