11 Arelh ranem ikwer-warl angkek, “Atyetyartay! Ngenty kwaty-itwel yanhan kwen innga. Ampwal ngkwenh arrangkwarl kwaty inpetyekan. Nthenh-itwek ntwa inpem, kwaty itethiley-angker?
12 Artwa arrwekeleny anwernekantherr Jacob ran ngenty angernek, ra kwaty antywenh ikwer-penh, alerikw-rnem-then atnwenth-rnem ingkerrenh anthwengilenh. Nganang ilkwa Jacob-angkwarran?”
13 Jesus-el renh tyernek, “Ingwerentyel ngenty nhenh-penh antywenty, rap angkep angkethakw irreynem.
14 Ingwerentyel kwaty impen antywenty, kwaty atharl anthem, rap anthweng intem-antey anem. Kwaty impen antywenty, nganem iteth intem-antey Akngey-kenh-angkwarr aneyenh.”
15 Arelh angkek, “Atyetyartay, kwaty antha, ayeng anthweng intem anayntetyek, ayeng angkepelarreng ngenty nhenh-warl apey-alperl-anekerr.”
16 Jesus-el arelh renh ilek, “Ntwang anewengkw ngkwenh ikngwerl-alpa.”
17 Ra tyernek, “Ayengan anewek arrangkwarl.” Jesus angkek ikwer-warl, “Nga arratyarl ilelheyel, anew-akert-weny.
18 Ngkwenh anewengkw 5-pel arrwekel anenh. Aley-anem nga artwa ingwer-itwel arwapeny aneyel. Ngarl atyeng ilelhek arratyarl.”
19 Arelh angkek, “Atyetyartay, atha ngenh iterl-areyel, ngan Ingkart-kenh angkakertarl.
20 Arrwekeleny-rnem apwert Gerizim nhenh-warl akarrirrenh Ingkartek kwenirretyek. Arrantherr Jew-rnem Jerusalem-warl alhetyek, Ingkartek kwenirremel inkwerelhetyek. Nthenh ra Ingkart-kenh apwert aknganenty innga anwantherr ikwer kwenirrey-alhetyek, arratyek-ayteng? Apwert Gerizim apek? Apwert Jerusalem-itwek apek?”
