4 Nicodemus yarnin ile inangk, Yarild atyan korn winmelin yaral itye yandeorn. Mengy’ itye yappulun mankurangk narkowan, mengy itye pingkani ninkandai.
5 Werentun ile Jesuse, Katyil, katyil, atte tingowun umangk, ungunuk ityan korn nowaiy winmelin in angk ai bahrekar in angk ai Pangari Jehovald noway el itye yappulani wyirrewarre Jehovald.
6 Ungunuk ityan korn winmelin nguldungar wunyitye ellin ngulde; ungunuk ityan winmelin Pangariungai wunyityan ellin Pangari.
7 Wurruwarrin inde atte tingowun umangk. Ungunuk um nowaiy winmelin yammallellin nowaiy inde yappulani wyirrenangk.
8 Nginte kungun ityan maiye kurunkun, nowaiy inde nglemin yarnd itye; nowaiy inde nglemin yang itye ngowalle: lun ennin ile nunkeri Pangari Jehovald winmin an nunkerar kornar.
9 Werentun ile Nicodemus, Yarild ityan.
10 Werentun ile Jesuse, Minge nginte ellin magistrate Israelald, nowaiy inde an nglemin harnakar.
11 Katyil, katyil, atte tingowun umangk, ngurn yarnin yare urn nglemin, ngurn tingowun umangk yare urn nakkir, wunyinde nowaiy wurruwarrin.
12 Ungunuk atte tingowir umangk al atyan ruwe wunyinde nowaiy wurruwarrin, meng inde wurruwarrin ungunuk atte tingowun umangk al ityan wyirrewarre.
13 Tarno korn wankir wyirrenangk. Kityai, yare itye puntir wyirreanmant; Porl Kornalde, yar itye lewin wyirrewarre.
14 Mosese ile yan preppir kraiye ngerak-kangk, lun ellin el ar preppani ityan Porl Kornalde.
15 Ungunuk kornar wurruwarrin ityan wunyar nowaiy el bailpulun, tumbewarrin ar kaldowamp.
16 Lun ellin Jehovah an pornun an Narrinyeri: pempir ile ityan kinauwe Brauwarate, ungunuk korn wurruwarrin ityan, nowaiy el itye moru hellangk, tumbewarrin itye kaldowamp.
17 Nodvaiy ile yan Jehovah taiyir naitye porl, hil amb ukke, kondem em an Narrinyeri; hil amb ai ile taiyir ityan, yultun an narrinyerar hell an mant.
