28 Mina vegu tau gade bi Jordan koru di meda dadido eta rofu Bethany ri vata niyadi; mina sanari John yaku babatiso regamo.
29 Ari uveyori John yaku Iesu ina rofu baedo ma vesi niyo, “Sei di Mamoe mida mini, kaere yaku kono tora noibanu vene di vegu no erufudo!
30 Na yaku nigamaka amiye bi mini, resi niyaka, ‘Amiye yokoi na usi baedo, bi na kana de; bi isivaga iniye, na vata nina koderi ina bi amegamo dada.’
31 Ye na kaya na toto ina, idu na baeyaka bi koru dudu babatiso regamaka bi Israel vene rofu ina niokugika.”
32 Ma John bi ini beika veyo mina niokuyo: “Vima bi pune erena kana oma gutuna desi ina fafau rou riyo mina veyaka.
33 Na kaya na toto ina, idu Sei, kaere yaku koru dudu babatiso regi na nifeideyo, bi na rofu niyo, ‘Vima vegiya ma desi amiye yokoi fafau amego; mina bi kaere Vima kikifa dudu babatiso rego.’
34 Ma na bi vesi niokuyaka ina bi Sei di mida.”
35 Ari uveyori John bi mironari ini usi dina amiye remanusa dudusa are regamadiri,
36 Iesu nana rei bae boyo ma vesi niyo, “Sei di Mamoe mida bi mini!”
37 Kamini ini usi dina vene remanu mina neidesi Iesu usi boyadi.
38 Iesu kero resi ina usi baededi mina vesi nikaiteyo, “Ya bi beika maina rededi?” Ma nikabai reyadi, “Rabbi (ini adina bi ‘Oteimana amiye’), ya bi goinari ameisa?”
39 Nikabai reyo, “Baesi ma ya kaya vegedi.” Ye inasa bosi ini amedo sana vesi mina medari ameyadi, meda nemoko bi 4 kana uriyenau niyo dada.
40 Ina vene kaere John ago niyo mina neidesi Iesu usi boyadi yokoi bi Andrew, Simon Peter di dubuini.
41 Kamini ini dubuini Simon siko baku resi niyo, “Una bi Keriso (ini adina bi ‘Auba reyo amiye’) baku reyafa.”
42 Resi Iesu rofu afei boyo. Ma vesi niyo, “Ye ya bi Simon, John di mida, idu bi yi roka Cephas (ini adina bi Peter o ‘fore’) nigedi.”
43 Ari uveyori Iesu Galilee bogika mokeyo. Philip baku resi niyo, “Na usi bae!”
44 (Philip bi Bethsaida taoni amiye, Peter ma Andrew yaku amededi taoni.)
45 Philip yaku Nathanael baku resi niyo, “Una bi Moses yaku ago girari ma Sei di ago niyadi vene ka bura reyadi di amiye baku reyafa. Ina bi Iesu Nazareth amiye, Joseph di mida.”
46 Ye Nathanael yaku niyo, “Beika buni Nazareth gutuna baego?” Ma nikabai reyo, “Baesi ve.”
