11 Ma Jesus te ghilala tua ahei ke peroa. Na pukuna keri ge bosa, “Mi ghau tau marabu tua, me mua ighau udolu.”
12 Mi murina Jesus te sau sokoi tua na tuadira, agaia te ghoi pupulu me oli tana malana tana bela ni vanga, ge huatira, “?Au ghilala so na hava tu gonia vanighau?
13 Ighau tau holou nia na Tarai mana Lord, me utuni na hava tau bosaa, na pukuna inau sughua gaia.
14 Inau, nimiu na Lord mana Tarai, tu saui na marevomiu. Ighau ghua kau sopa saui na marevomiu heghemiu.
15 Inau tu tatea vanighau tua na nilabu kau taonia, keri ge kau nea te vagha tu tatea vanighau tua.
16 Inau tu bosa utuni vanighau, na seka te mua haba vulea na vunaghina, mana tinoni hola rongorongo te mua haba vulea na tinoni te nia vetena.
17 Mi taeni tau manahana na utuni eni, ke vagha kau gehegehe taonia, God ke vautoghau!
18 “Inau tu mua bosai vanighau ighau udolu, na lei totobo raini. Inau tu ghilala udolura nigua rahei tu vilira tua. Mana gegere tabu ke mai utuni mughua te ghaghua, ‘Na mane te niu vanga koukolu te kanahaghiniu.’
19 Inau tu bosa vanighau taeni eni naghona ge ke kale, keri ge na bona ke kale, ge kau taluutuniu inau tua na Messiah.
20 Inau tu bosa utuni vanighau, ahei tua ke lavipangotia ahei tu nia vetena ke, ma gaia te lavipangotiu ghua inau. Ma hei tua ke lavipangotiu inau ke, ma gaia te lavipangotia ghua te niu vetena mai.”
21 Murina Jesus te bosa eni, gaia te gunaguna ngangata na kutuna, ge bosa tate, “Inau tu bosa utuni vanighau, sakai tamiu ke perou.”
22 Mana lei vaovarongo tara sopa vaevane heghedira, mara ghanaghana ruarua ahei tadira te kalea na bosana.
23 Ma sakai tadira na vaovarongo, gaia Jesus te dolovia, te sopou lilighina.
24 Ma Simon Peter te tongaghi vania me ghaghua, “Ko huatia, ahei te bosa.”
25 Mana vaovarongo keri te varava va tana luhuna Jesus, me huatia, “?Lord, ahei gaia?”
26 Jesus te bosa vania, “Inau ku lumia na pile berete tana popo mu ku vahea, agaia keri na tinoni.” Keri ge hola na pile berete, me lumia ge vahea Judas, na dalena Simon Iscariot.
27 Tana bona te ghania mua na berete Judas, Satan te haghevia tua. Ma Jesus te bosa vania Judas, “Ko minaa na hava ko gonia!”
28 E taho siki sakai tadira tara sopou tana bela ke ghilala ivei tea ge bosa vania.
29 Na pukuna Judas te righitaonia na kei ni rongo, na balu vaovarongo tara ghanaghana ke, ma Jesus te bosa vania ge ke vaa pelui na hava tara lioni tana gougonu pa kara vahera tara bona.
