34 Na vure tara huatia, “Ighai tai ghilala so, adida na vetena te bosa vanighai ke, mana Messiah ke vola talau tua. ?Mi vei tea ge o bosa ke mana Dale Tinoni kara taludatoa mughua? ?Ma hei gaia na Dale Tinoni eni?”
35 Jesus te bosatughu vanira, “Ke daro ni bona pile so ke ghaha na marara itamiu. Kau tona haliu so tana halautumiu tana bona tau loghoa na marara, keri ge na pungi ke mua kuvihighau. Na pukuna ahei te sakutua tana pungi ke, te mua ghilala ivei te vaa.
36 Kau taluutunia na marara tana bona tau loghoa, keri ge kau tinoni ni marara.” I murina Jesus te bosa vanira eni, gaia te tona me polo vanira.
37 Sakai mana te gonighi na lei butuli raini tana matadira, e subo na vure tara mua taluutunia.
38 Keri ge na hava na prophet Isaiah te bosa idania te mai utuni, ?Lord God, ahei te taluutunia na rongorongo tai ladavaghinia? ?Mi ta hei na Lord God te tatea nina maana?
39 Te vagha keri ge ra nina tangomana na taluutuni, mana pukuna na prophet Isaiah idania te bosa ghua,
40 God te pungihighi na matadira, me ngasilighi na kutudira, keri ge na matadira ke mua vaevane mana tobadira ke mua ghilala, keri ge kara mua ririu mai tatana me ke volara.
41 Isaiah te bosa te vagha eni na pukuna God te ladavaghinia nina rongoragha Jesus.
42 Hauva, subo na habadira na Jew tara taluutunia Jesus, mana pukuna tara mataghunira na lei Pharisee, ge ra mua bosa tatea, na pukuna na lei Pharisee kara sonihorura gea tana Vale Kokoeliulivuti ni Jew.
43 Na habadira tara nea eni, na pukuna tara liodira vaa na talunagho ni tinoni, vulea na talunagho ta God.
44 Jesus te nia bosa na manga sule me ghaghua, “Ahei tua ke taluutuniu, te mua taluutuniu vamua inau, ma gaia ghua God, te niu vetena mai.
45 Ma hei tua te righiu ke, me righia ghua agaia te niu vetena mai.
46 Inau tu mai tana maramana eni te vaghaa na marara, keri ge agaira udolu tara taluutuniu kara mua ghahara tana pungi.
