Johanningundru 7:16-29

¹⁶Jesujeli tanangu kalabana wonti ja jatana wonti: “Ngakani ngujangujara wata ngakani nganai, a-ai, nunkani, Nulia ngana jinpanala.

¹⁷Kulnujeli ngantjanani nunkani jertapaterina ngankala, nulupini ngujamala nganai, naupini ngujangujara Godandru ngananani kara, ngato ngakangundru muntali kaukaubanani kara.

¹⁸Warle nunkangundru muntali kaukaubai, nulu pirnala nunkani wontiai; warle nunkanipini pirnaia wontiai, Nulia ninaia jinpanala, Nauja morlalu nganai, ja madlentji wata nunkangu nganai.

¹⁹Wata Mosili jurangu jirijiribani jaura jinkina wonti? Ja wata kulnujeli jurangundru jirijiribani jaurani pankiai; Minandru jura wontiai ngana naria nandrala?”

²⁰Kana wolarali kalabana wonti ja jatana wonti: “Jundru kutji ngamalkai; warle wontiai, jidna naria nandrala?”

²¹Jesujeli kalabana wonti ja tanangu jatana wontj: “Ngankana kulno ngato ngankana warai, ja jura pratjana ngaruparai.

²²Jendrangundruja, ngangau Mosili jurangu kaluwali ngankani jinkina wonti, — nau wata Mosingundru, a-ai, ngaperi worandru — jura bakana Sabbatani karuwali ngankai

²³Kana kulnujeli karuwali ngankala Sabbatani maninani, ngangau Mosini jirijiribani jaura wata wokaribananto; ngakangu jura tiririai, ngangau ngato kaha kulno tepi ngankana warai Sabbatani?

²⁴Wata kalala kuranau milkieli najinandru, a-ai, kalala talku kuranau?”

²⁵Jerusalemala palpa jatana wonti: “Wata Naupini Nauja nganai, ninaia tanali wontiai naria nandrala?

²⁶Ja mai, Nulia tinkari kaukaubai, ja tana nunkangu panila jatai. Kana kaparali morlalu ngujamana warai, Naupini Christus nganai?

²⁷Ninapini ngaiani ngujamai wodajerindru Nauja nganai; Christus wokaranani, wata kulnujeli ngujamala nganai, wodajerindru Nau nganai.”

²⁸Jendranguta Jesus Godaia pungani parparali maritjina wonti ja ngujangujara jinkina wonti ja jatana wonti: “Kau, jura ngana ngujamai, ja bakana milkila wodajerindru ngani nganai; ja ngani wata ngakangundru munta wokarana wonti a-ai, Naupini morlalu nganai, Nulia ngana jinpanala, ninapini jura wata ngujamai:

²⁹Ngato ninaia ngujamai; ngangau ngani nunkangundru nganai, ja Nulia ngana jinpanala.”