Johanningundru 7:10-19

¹⁰Ngatata nunkani matja tarana, ngadani Nau bakana ditji pirnaia tarana wonti, wata kantji, a-ai, kurukuru jeri.

¹¹Juda kanali nina wontina wonti ditji pirnani ja jatana wonti: “Wodajeri Nau?”

¹²Kana wolara marapujeli nunkangundru buljubuljurilkijiribamalina wonti. Palpa jatana wonti: “Nau ngumu nganai;” palpa jatana wonti: “Pani, Nulu kana wolara karkarkai.”

¹³Wata kulno nunkangundru tinkari jatana wonti, ngangau tana Juda kanandru japali nganana wonti.

¹⁴Ditji pirna worani terti Jesus Godaia pungani tarana wonti ja ngujangujara jinkina wonti.

¹⁵Ja Juda kana ngaruparana wonti ja jatana wonti: “Worderu Nulupini jauraia kirila ngujamai, wata Nauja ninaia kirina warai?”

¹⁶Jesujeli tanangu kalabana wonti ja jatana wonti: “Ngakani ngujangujara wata ngakani nganai, a-ai, nunkani, Nulia ngana jinpanala.

¹⁷Kulnujeli ngantjanani nunkani jertapaterina ngankala, nulupini ngujamala nganai, naupini ngujangujara Godandru ngananani kara, ngato ngakangundru muntali kaukaubanani kara.

¹⁸Warle nunkangundru muntali kaukaubai, nulu pirnala nunkani wontiai; warle nunkanipini pirnaia wontiai, Nulia ninaia jinpanala, Nauja morlalu nganai, ja madlentji wata nunkangu nganai.

¹⁹Wata Mosili jurangu jirijiribani jaura jinkina wonti? Ja wata kulnujeli jurangundru jirijiribani jaurani pankiai; Minandru jura wontiai ngana naria nandrala?”