4 Matja tanluibanarina, Jesus dirkalani terkana wonti; ja mili wata milkila nganana wonti Nau Jesus nganai.
5 Jesus tanangu jatana wonti: “Kupa worajai, jura wata tajila ngarnalkai?” Tanali nunkangu kalabana wonti: “Pani.”
6 Nau tanangu jatana wonti: “Bota panki ngunarani jama woranau, ja jura mankamankala nganai!” Tanali worana wonti, ja tana ngandandarina wonti nina parumala paru marapundru:
7 Naupini mili, nina Jesujeli ngantjana wonti, Petrungu jatana wonti: “Nauja Kapara nganai!” Simon Petrulu ngarana wonti Nau Kapara ngananani, nau katieli ngampina wonti, ngangau nau balu nganana wonti, ja ngapani kulkungana wonti.
8 Mili nguru botali wokarana wonti, ngangau tana wata worita nganana wonti dirkalandru, a-ai, windri tintipitiwidri 200, ja tanali jama parunto parumana wonti.
9 Tana matja dirkalaia dunkana tarana, tanali najina wonti turubilla turn paranani, ja paru nunkangupini paranani, ja buka.
10 Jesus tanangu jatana wonti: “Padakanau tanangupini parundru, tananaia jura karari patana warai!”
11 Simon Petrus wapana wonti, ja jama dirkalaia parumana tarana wonti, paru pirna manamiri 153. Jeruntjajeli jama wata purana wonti.
