10 Jesus tanangu jatana wonti: “Padakanau tanangupini parundru, tananaia jura karari patana warai!”
11 Simon Petrus wapana wonti, ja jama dirkalaia parumana tarana wonti, paru pirna manamiri 153. Jeruntjajeli jama wata purana wonti.
12 Jesus tanangu jatana wonti: “Kaparanau, manabuka tajanau.” Wata mili kulno wontjana wonti nina jakalkala: “Worana jidni?” Ngangau tana milkila nganana wonti, Nau Kapara nganana wonti.
13 Jesus wokarana wonti, ja buka patana wonti, ja tanangu jinkina wonti, ja bakana parundru.
14 Naupini pota parkulu nganai, Jesus milini wondraterina wonti, Nau narindru matja tepi terkakana warai.
15 Tanali manabuka matja tajina, Jesus Simon Petrungu jatana wonti: “Simoniai, Jonani ngatamurajai! Jundru ngana morla ngantjai tanangupini?”: Nau nunkangu jatana wonti: “Kau Kaparajai, jidni milkila, ngato jidnana ngantjai.” Nau nunkangu jatana wonti: “Ngakani tjipi kuparu ngamalkau!”
16 Nau nakaldra pota mandrula nunkangu jatana wonti: “Simon Jonaniai! Jundru ngana ngantjai?” Nau nunkangu jatana wonti: “Kau Kaparajai, jidni milkila, ngato jidnana ngantjai.” Nau nunkangu jatana wonti: “Ngakani tjipi ngamalkau!”
17 Nau pota parkulula nunkangu jatana wonti: “Simon Jonaniai! Jundru ngana ngantjai?” Petrus ngaurongauro nganana wonti, ngangau Nau pota parkulu nunkangu jatana wonti: “Jundru ngana ngantjai?” Ja nau nunkangu jatana, wonti: “Kaparajai, warupoto jundru milkila, jundru ngujamaj, ngato jidnana ngantjai.” Jesus nunkangu jatana wonti: “Ngakani tjipi ngamalkau!
18 Morlalu, morlalu, ngani jinkangu jatai: Jidni teri ngananala, jidni munta ngampinala, ja wirarinala woderi jundru ngantjanala; jidni matja pinaru pantjina, jidni mara jinkani ngutaterila nganai, ja kulno ngurujeli jidna ngampipala nganai, ja wapalkala nganai woderu jundru wata ngantjai.”
19 Ninapini Nau jatana wonti wondrala, mina narieli nulu Goda pirna ngankananto. Ja Nau jenia matja jatana, Nau nunkangu jatana wonti: “Ngakangu karipateriau!”
20 Petrus karitjinawontikana wonti, ja nulu nina mili karipaterinani najina wonti, nina Jesujeli ngantjana wonti, nau bakana bukani nunkangu munambirini jeniterina wonti ja jatana wonti: “Kaparajai, worananau nganai nulu jidna wondawondala nganai?”
21 Nina Petrulu najina, nau Jesungu jatana wonti: “Kaparajai, mina nunkangupini?”
