19 Iei usun pwüngün ewe apwüng: Ewe saram a tolong lon fanüfan, nge aramas ra efich rochopwak lap seni saram, pun ar föför a ngau.
20 Iö a föri mine a ngau a oput saram, esap mochen tolong lon saram, pun a niuokus pwe an kewe föför repwe pwäla.
21 Nge iö a föri mine a let a tolong lon saram, pwe ewe saram epwe pwärätä pwe mine a föri a föri lon an aleasochisi Kot.”
22 Mürin ei pworaus, Jesus me nöün kewe chon kaiö ra feila lon ewe fanü Jutea. Ikenan a nonom rer eu fansoun o papataisi aramas.
23 Nge Johannes a pwal papataisi aramas lon Änon arap ngeni Salim, pun a wor chomong koluk ikenan. Iwe, aramas ra feito ren o a papataisiir.
24 (Ei a fis me mwen än Johannes tolong lon fötek.)
25 Iwe, ekoch nöün Johannes kewe chon kaiö ra popuetä le anini ngeni eman re Juta usun ar limeti inisiir me mettochur lon pwüngün ar lamalam.
26 Iwe, ra feila ren Johannes o üreni, “Sense, ka chechemeni ewe mwän a nom reöm ötiuen ewe chanpupu Jortan, ätewe ka kapas ngenikem usun? Iei a papataisi aramas o aramas meinisin ra feila ren.”
27 Johannes a pölüeni, “Esap wor eman a tongeni angei och are Kot esap ngeni.
28 Püsin ämi oua tongeni pwärätä pwe ngang üa apasa, ‘Sap ngang ewe Kraist, nge Kot a tinieito me mwan.’
29 Ewe mwän apwüpwülü söfö i pwülüen ewe fin apwüpwülü söfö. Nge chiechien ewe mwän apwüpwülü söfö mi ü ünükün o aüseling a pwapwa lupwen a rongorong mwelien ewe mwän apwüpwülü söfö. Iei usun ai pwapwa a unusöchüla.
30 I epwe fokun tekiatä, nge ngang üpwe fefeitiu.”
31 Iwe, ätewe mi feito seni läng, i a lap seni meinisin. Ätewe mi pop seni fanüfan, i chon fanüfan, a pwal kapas usun mettochun fanüfan. Nge ätewe mi feito seni läng a tekia seni meinisin.
32 Iwe, a pwärätä usun mine a fen küna o rongorong, nge esap wor eman a etiwa an kapas.
33 Nge are eman epwe etiwa an kapas, a aletätä pwe Kot a let.
34 Iwe, ewe eman Kot a tinato a apasatä än Kot kewe kapas, pun Kot a aunusa ngeni Ngünün.
35 Ewe Sam a echeni Nöün o atolonga mettoch meinisin fän nemeneman.
36 Iö a lükü ewe Nau a eäni manau esemüch. Iö a lükümach ngeni ewe Nau esap eäni ewe manau, pwe än Kot song a nonom won.
