26 No ŋoŋere bahac â kiŋdâŋ bocjaha bajuekopac. Sorecnuwec eki dâŋ fârine muekac, eme noni micticnaonec manapo ijaha ʒira mâreŋko mufuaekopac.”
27 Mamac‐ticnere iŋuc jazame jaŋe mi mana tarambiŋ.
28 Irec Jesuzi ʒuhuckerâ ʒiŋuc jazawec: “Ŋoŋe Ŋic Fâri Wâtuŋne bâfeŋnerâ fuŋne‐ticne mana taraniŋmu. Erâ no nahacne maŋte wiac mi eekopac, Mamaczi qazu‐narewec dâŋ ijaha muekopac, i wâc mana taraniŋmu.
29 Sorecnuwec e nohec juekac. No dameŋ sâc wiac epe bape maname biaŋkeekacte no mi behecnuekac.”
30 Dâŋ iŋuc mume ŋic bocjahazi manasiŋkembiŋ.
31 Eme e manasiŋkembiŋ Judaŋic jaŋe hâcne ʒiŋuc jazawec: “Ŋoŋe nore dâŋko juhuc ine motec fuŋfuŋfâc‐nane eniŋmu.
32 Eme nore dâŋ fâri qizecne mana tarapie izi batarac‐ŋopame niŋgiŋ tâmiric sâcne erâ juniŋmu.”
33 Mume dâŋ ʒiŋuc bâtikiecnembiŋ: “Nâŋe Abrahamte ɋâricfâc, mozi mo kiŋaŋ qaqafâc‐ticne bacnâporâ niŋgiŋ‐nâpowecte go ʒiŋuc mukomec: ‘Niŋgiŋ tâmiric eniŋmu’?”
34 Eme Jesuzi ʒiŋuc jazawec: “No jâmbomac jâmbâŋ ŋazakopac, moc e sâqocne baocmuzi sâqocnere kiŋaŋ qaqa eocmu.
35 Kiŋaŋ qaqazi bomboŋ‐ticnere fic haeoa hati mi jurâ ju eocmu, ŋokâzi ine mamac‐ticnere fic haeo hati juraʒihuc juocmu.
36 Irec Ŋokâ eki firuec‐ŋopame ŋoŋe jâmbomac niŋgiŋ tâmiric juniŋmu.
37 “Ŋoŋe Abrahamte ɋâricfâc, i noni manakopac. Eme ŋoŋe ine dâŋnanezi ŋoŋerao hesowariekacte qâhâmocnuzo muŋgopieŋ.
38 No Mamac‐nanerao wiac honehuc jupo irec hâcne muekopac, â ŋoŋe ine ŋaŋacne mamactaonec wiac manambiŋ i eeŋgopieŋ.”
39 Mume ʒiŋuc âzâcnembiŋ: “Nâŋe mamac‐nâŋec Abraham.” Eme Jesuzi ʒiŋuc jazawec: “Ŋoŋe Abrahamte ɋâricfâc jurâ muzac e hawari enʒapiŋ.
40 Anuturao dâŋ fâri qizecne manapo i ŋazaekopac, ehame ŋoŋe nuzo muŋgopieŋ. Wiac iŋucne Abrahamzi mi ewec.
41 Ŋoŋe ine ŋaŋacne maŋte hata âteeŋgopieŋ.” Eme jaŋe mumbiŋ, “Nâŋe fiuckonec mi fuambeŋ, Anutu e Mamac‐nâŋec mocjaha.”
42 Mupie Jesuzi ʒiŋuc jazawec: “Mamac‐ŋeŋic Anutu eme muzac, no âgo enarenʒapiŋ. No Anuturaonec hâcne wahapo, no nahacne maŋte mi wahapo, eki sorecnume wahapo.
43 Weniŋuc erâ jupie dâŋnanezi maŋŋeŋicko mi huekac? No dâŋ mupe ŋoŋe hazec afec mi manaeŋgopieŋ irec hâcne.
44 Ŋoŋe mamac‐ŋeŋic Sataŋ, eme ere qafeŋko wiac eeŋgopieŋ. E mârâc jaha ŋic sisipiric juweczi juwareekac. E dâŋ fâri qizecne râpeckewecte maŋticnao jâmbomac dâŋ moc mi fokac. E bureczi nânâ opâ‐ticne ewec. E burecŋic â burecte mamac.
45 No ine dâŋ fâri qizecne ŋazaekopacte dâŋnane qikiŋneeŋgopieŋ.
46 Ŋoŋeraonec moczi sâcne nore bahac moc muocmu? Eme no sâc iŋucnezi dâŋ fâri qizecne ŋazape wemocte mi mana ʒakieeŋgopieŋ?
47 Moc e Anuture biŋe juocmuzi dâŋticne manaocmu. Ŋoŋe Anuture biŋe mi jueŋgopieŋte dâŋticne qikiŋneeŋgopieŋ.”
48 Mume Judaŋic jaŋe dâŋ ʒiŋuc bâtikiecnembiŋ: “Wiac wemo mueŋgopeneŋ, go Samaria ŋic, go demoŋzi egareekac.”
49 Eme Jesuzi ʒiŋuc jazawec: “No demoŋzi mi enareekac, no Mamac‐nane sâseekopac, ŋoŋe ine no ba jawa enareeŋgopieŋ.
50 No ʒâŋe biŋe‐nanere manabâc erâ mi ŋazakopac. Ʒâŋe biŋe‐nane hewirickerâ irec dâŋne mumu ine mocte gie.
51 No jâmbomac jâmbâŋ ŋazape mananiŋ: Moc e nore dâŋ bajuocmuzi hâmoc moc mi maicke‐jâmbâŋkeocmu.”
52 Iŋuc mume Judaŋic jaŋe kecʒiŋuc mumbiŋ: “Demoŋzi egareekac, i jâmbomac. Abraham hâmowec, â porofete jaŋe iŋuc jaha hâmombiŋ, ehame go ʒiŋuc mukic: ‘Moc e nore dâŋ bajuocmuzi hâmoc moc mi maickeocmu.’
53 Mamac‐nâŋec Abraham e sâkozi hâmowec, eme go ere sâc jâuruzo mukomec? Â porofete jaŋe iŋuc jaha wâc hâmombiŋ. Go wemocte sahacge boc bafekomec?”
54 Mupie Jesuzi ʒiŋuc jazawec: “No nahac sahac‐nane bafepe mi sâckeocmu. Mamac‐nane jukac, e Anutu‐nâŋec mucneeŋgopieŋ, eki ine muafecnuekac.
55 Ŋoŋe e mi mana taraeŋgopieŋ, no ine mana taraekopac. Irec no weniŋuc mi mana tarakopac mupemu. I mupe burec eme ŋoŋere sâc ezapo. Aricne, no mana tarahuc dâŋticne bajuekopac.
56 Mamac‐ŋeŋic Abraham e nore ʒâfo maickeme honeocte aŋac sâko bajuwec. Erâ juku maickeme honerâ ʒeri ewec.”
