21 Eme wokeo ropie feocte ehapie izia woke mâreŋ razo mumbiŋko fisiwec.
22 Ŋic guru sâko jaŋe riqic ocniŋucnao fohapie hae furewec. Hae fureme ʒiŋuc mumbiŋ: “Jacne ŋafeo woke mocsâkoa ŋeme honembeneŋ, ira motecfâcne Jesu beherâ buc ferâ rambieŋ.”
23 Iŋuc manahuc ŋehapie Tiberia haeonec woke gâcne Wofuŋzi daŋge murâ poroŋ gumec‐jopawecko ware fisimbiŋ.
24 Eme ŋic jaŋe Jesu e jahacne â motecfâcne basac‐joparâ wokeo ferâ Kafanaum haeo risie rarâ ira basambiŋ.
25 Riqic ʒiŋucnao basaku bâfuarâ mumbiŋ, “Qaqazu, go wezimucne waremec?”
26 Wiocnepie ʒiŋuc jazawec: “No jâmbomac jâmbâŋ mupe mananiŋ, ŋoŋe fuŋne qaqa mâsi bape honeeŋgopieŋ irec mâcne, nânâ gumec‐ŋopape nâ gapec embieŋ, irec basacnuŋgopieŋ.
27 Ŋoŋe gie banʒepieŋ, erâ nânâ sisirowenere mâcne, juju sanaŋte nânâ irec giene banʒepieŋ. Ŋic Fâri Wâtuŋne eki, Anutu Mamaczi kamac sarahuc âkendâŋnewecte, juju sanaŋte nânâ i sâcne ŋareocmu.”
28 Mume dâŋ ʒiŋuc bâtikiecnembiŋ: “Nâŋe weniŋuc erâ Anuture gie banaŋmu?”
29 Eme ʒiŋuc jazawec: “Ŋic sorewec e manasiŋkezo, izi Anuture gie biŋe‐ŋeŋic ekac.”
30 Mume dâŋ ʒiŋuc âzâcnembiŋ: “Mo fuŋne qaqa mâsi mo batec honerâ manasiŋgunaŋmu? Mo gie mo bacmu?
31 Mimiŋnefâc‐nâŋec jaŋe mâreŋ sawao mana nâjumbieŋ. Eme irec dâŋqâreŋ ʒiŋuc fokac: ‘Sambâŋkonec nânâ jareme nâjumbieŋ.’”
32 Eme Jesuzi ʒiŋuc jazawec: “Jâmbomac jâmbâŋ mupe mananiŋ: Mose e sambâŋkonec nânâ mi bâfua‐ŋarewec, Mamac‐nanezi sambâŋkonec nânâ fârine ŋareekac hâcne.
33 Nânâ sambâŋkonec waharâ mâreŋŋic juju bâfua‐ŋareekac izi Anuturaonec nânâ fârine ekac.”
34 Mume ʒiŋuc âzâcnembiŋ: “Wofuŋ, go nânâ mukic i dameŋ sâc nârezemec.”
35 Eme ʒiŋuc jazawec: “Jujure nânâ no hâcne. Moc e norao qohotaocmu e nânâre moc mi hâmoocmu, â moc e no manasiŋnuocmu e opâre moc mi hâmoocmu.
36 No ine ŋazape, ŋoŋe no honecnu‐bipiehuc sifu mi manasiŋnueŋgopieŋ.
37 Mamaczi nareekac i jaŋe norao fisi‐fâreniŋmu, â norao fisiocmu e mi bâsuepemu.
38 Sambâŋkonec wahapo i no nahacne micdâŋ dopeckepemurâ mâcne, sorecnuwec ere micdâŋ dopeckepemurâ wahapo.
39 Mamac‐nanezi norao râec‐jopaekac ŋic i jaŋe sipirickenʒipiŋte hone qâzuc ejareku dameŋ sâkoo furu jaha wiwic‐jopape faharenʒoŋgopieŋ; sorecnuwec ere micdâŋ iŋuc hâcne fokac.
40 Ŋokâ hone dendeŋnehuc manasiŋkeniŋmu sâc juju sanaŋ rauckeniŋmu; Mamac‐nanere micdâŋ iŋuc hâcne fokac. Eme noni dameŋ sâkoo bâɋârec‐jopazokopac.”
41 Jesu e “sambâŋkeonec nânâ no hâcne” iŋuc muwecte Judaŋic jaŋe mana sâqorecnehuc dâŋembiŋ.
42 Ehuc ʒiŋuc mumbiŋ: “Wiac Jesu e Josefere ŋokâ, neŋgoc mamac jahec‐ticne i nâŋe honec‐jofaeŋgopeneŋ. Eme wemocte ʒiŋuc mukac: ‘No sambâŋkonec wahapo’?”
43 Mupie Jesuzi ʒiŋuc jazarâ muwec: “Ŋoŋe boc mi manapie sâqorezejec.
44 Ŋic moc e jahacne maŋte norao fifisi i mi fokac, Mamac sorecnuwec eki fâreme fifisine ine fokac. Eme noni ŋic iŋucne e dameŋ sâkoo bâɋârezokopac.
45 Porofete jaŋere dâŋqâreŋ ʒiŋuc fokac: ‘Anutu e jahac ŋic sasawa miti jaza qazuc eocmu.’ Irec moc e Mamaczi miti âzâcne qazuc eme manaocmu e norao fisiocmu.
46 Ŋic moczi moc Mamac honewec i mi fokac, Anuturaonec wahawec e mocjahazi Mamac honewec.
47 No jâmbomac jâmbâŋ ŋazape mananiŋ: Moc e no manasiŋnuocmuzi juju sanaŋhec eocmu.
48 Jujure nânâ no hâcne.
49 Mimiŋnefâc‐ŋeŋic jaŋe mâreŋ sawao mana nâipiehuc hâmo‐fârembiŋ.
50 Â sambâŋkonec nânâ nârâ mi hâhâmo ine norao fokac ʒi.
51 Jujure nânâ sambâŋkonec wahakicne no nahacne hâcne. Irec moc e noraonec nânâ nârâ juraʒihuc juocmu sanaŋ. Biuc‐nanezi nânâ ekac, i ŋiczi juju bâfuaniŋte ŋarepemu.”
52 Eme Judaŋic jaŋaczia mu qaqatarac erâ mumbiŋ, “E weniŋuc erâ biuc‐ticne nâreme nanaŋmurâ mukac?”
53 Epie Jesuzi ʒiŋuc jazawec: “No jâmbomac jâmbâŋ ŋazakopac, ŋoŋe Ŋic Fâri Wâtuŋne ere biuc â soc mi nâniŋmuo maŋŋeŋicko juju mi fuaocmu.
54 Moc e nore biuc â soc nâocmuzi juju sanaŋhec eocmu, eme noni dameŋ sâkoo bâɋârezokopac.
55 Nore biuc izi nânâ fârine, â nore soc izi opâ fârine.
56 Nore biuc â soc nâocmuzi no maŋnuocmu a noni e maŋkepemu.
57 Mamac e juju runezi sorecnume wahapore Mamacte erâ juekopac, eme no nâcnuocmuzi iŋuc jaha nore erâ juocmu.
58 Sambâŋkonec nânâ irec fuŋne iŋuc fokac. I mimiŋnefâc‐ŋeŋic nâmbiŋ iŋucne mâcne. Jaŋe nâipiehuc hâmombiŋ. Â nore nânâ ʒi nâocmu e ine juraʒihuc juocmu sanaŋ.”
