6 Eme Jesuzi ŋic e honerâ dameŋ ʒora fohuc jukac, iŋuc manarâ wiocnerâ muwec: “Go ɋiɋic qacmurâ egarekac me?”
7 Eme puriŋzi muwec, “Bomboŋ, mo ŋic mo junarekaczi opâ qiriŋ qaha riqicko râecnuzac? Â no nahac huzo mupe ine moczi biac âkehocnurâ huekac.”
8 Mume Jesuzi ʒiŋuc âzâcnewec: “Go faharerâ fofoge rorâ rac.”
9 Mume izia sahac‐ticne biaŋkeme faharerâ fofo‐ticne ameckerâ rawec. Ʒoaŋ ira ine sabata hombaŋ ŋembiŋ.
10 Irec Judaŋic jaŋe ŋic ɋiɋic qawec e ʒiŋuc âzâcnembiŋ: “Miŋecgac hombaŋko fofoge hâpokomec i mi eene.”
11 Mupie ʒiŋuc jazawec: “Bâpiaŋnukaczi ʒiŋuc naza sorec ekac: ‘Fofoge rorâ rac.’”
12 Mume wiocnerâ mumbiŋ, “Fofoge rorâ rac gazajec ŋic e ʒâŋene mo?”
13 Mupie ŋic biaŋkeweczi kâuc bawec. Jesu e ŋicguru ira domambiŋ jaŋere ŋondeŋko kamierâ rawec.
14 Izi ʒâhec Jesuzi ŋic e taha ufuŋko bâfuarâ uŋ ʒiŋuc âzâcnewec: “Go sahacge biaŋkejec, eme wiac ŋemâc bâmâcne jâmbâŋ fua‐garezacte sâqocne mocwâc mi bazemec.”
15 Eme ŋic e Jesu hone tararâ ra Judaŋic ʒiŋuc jazawec: “Ŋic bâpiaŋnukac ʒâŋene Jesu.”
16 Jesu e sabata hombaŋko gie iŋucne bawecte Judaŋic jaŋe râsi ecnembiŋ.
17 Epie Jesuzi ʒiŋuc jazawec: “Mamac‐nane e gie ʒuʒuhuc jaha baekac, eme noni iŋuc jaha wâc eekopac.”
18 Eme Jesu e sabata hombaŋ hesifuckewec â Anuture Mamac‐nane muhuc Anuture sâcko ʒuhuckewec, Judaŋic jaŋe wiac jajahec irec erâ mana gâpârerâ qaniŋte mumbiŋ.
19 Eme Jesuzi dâŋ ʒiŋuc jazawec: “No jâmbomac jâmbâŋ ŋazape mananiŋ, Ŋokâzi maŋticnere sâcne gie mi baekac, Mamaczi bame sâc honehuc baekac. Eki baekac ijaha Ŋokâzi baekac.
20 Mamac e Ŋokâ honebâckeekacte gie baekac sâc jâutu‐fâreekac, erâ gie ʒi honeŋgopieŋ sawa mâcne, fekicne sâko jâutume ŋoŋe honerâ wareckeniŋmu.
21 Mamac e hâmokicne wiwic‐joparâ bâɋârec‐jopaekac, iŋuc jaha Ŋokâzi e me e bâɋârezo murâ bâɋâreocmu.
22 Erâ Mamac e ŋic okacnere dâŋ mi mutara‐jareekac, gie i Ŋokâre meo râewec.
23 Eme ŋic jaŋe Mamac sâseeŋgopieŋ iŋuc jaha Ŋokâ sâsenʒepieŋ. Moc e Ŋokâ mi sâseocmuzi, Ŋokâ sorewec, Mamac hâcne, e iŋuc jaha mi sâseocmu.
24 No jâmbomac jâmbâŋ ŋazape mananiŋ: Moczi nore dâŋ mana maŋ ehuc, sorecnuwec e manasiŋkeocmu, ŋic e ʒiŋuczia juju sanaŋhec ekac. E okacnere biŋe mi ee hâmoc râpeckerâ jujuo raʒiwec jukac hâcne.
25 No jâmbomac jâmbâŋ ŋazape mananiŋ: Dameŋ moc maickeocmu, erâ ʒi biac maickekac hâcne, ira hâmokicnezi Anutu Ŋokâ‐ticne ere dâŋ manarâ ɋârerâ juniŋmu.
26 Mamac e jujure fuŋqizecne, eme Ŋokâ e iŋuc jaha jujure fuŋqizecne eocte qikiŋnecnewec.
27 Erâ e Ŋic Fâri Wâtuŋne jukacte ŋic okacnere dâŋ mutara‐jareocte mucnewec.
28 Dâŋ irec manapie mi quŋkezejec. Dameŋ moc bakicne fokac i maickeme ʒâŋeruŋko foeŋgopieŋ jaŋe ere dâŋ wiwira manarâ wefunʒoŋgopieŋ.
29 Ehuc juju biaŋne jumbiŋzi juju sanaŋte faharenʒoŋgopieŋ, â juju sâqocne jumbiŋzi kiŋte okacne roniŋte faharenʒoŋgopieŋ.
30 No nahacne maŋte gie i bapane mi fokac, Mamac‐nanere micsâcko sawa okacnere dâŋ mutara‐jareekopac. Iŋuc ehuc okacnere gie bape sâckoa eocmu. I no nahacne dâŋ mâcne, sorecnuwec ere dâŋ ʒaeckeekopac.
31 “No nahac fuŋne‐nane mutaniŋkepe fârimâc eocmu.
32 Fuŋne‐nane i moczi mutaniŋkeocmu, erâ no manakopac, fuŋne‐nane mutaniŋkeme fârine eocmu.
33 Ŋoŋe Johane mu indiŋ ecnepie dâŋ fâri qizecne mutaniŋkewec.
