7 Ŋoŋe fufua ɋâricne fuaniŋte mupe go manatec mi quŋkeoc.
8 Mâŋâŋ e kosa qaekac, eme go fânâŋ‐ticne i manaekic, â fuŋne wenirec fuŋkerâ wareekac, â wena rataraekac, ine mi manaekic. Eme moc e Mârore kiwecko fuakicne, e fuŋne‐ticne iŋucnea fokac.”
9 Mume Nikodemozi dâŋ ʒiŋuc bâtikiecnewec: “I weniŋuc erâ iŋuc ezo?”
10 Mume Jesuzi ʒiŋuc âzâcnewec: “Go Israe ŋic jaŋere qaqazuzi irec kâuc bakomec me?
11 No jâmbomac jâmbâŋ gazape: Nâŋe wiac hone manac eeŋgopeneŋ ijaha ŋaza mutâc eeŋgopeneŋ, eme ŋoŋe ine dâŋnâŋec qikiŋneeŋgopieŋ.
12 Wiac mâreŋko fufuane irec mac ŋazape sifu mi mana ʒakieeŋgopieŋ, eme wiac sambâŋko fufuane irec ŋazape wemo‐ŋeŋiczi mana ʒakieniŋmu?
13 Ŋic moczi sambâŋko moc mi fewec, Ŋic Fâri Wâtuŋne, sambâŋkonec wahawec, e mocjahazi sambâŋko wâc juekac.
14 “Mose e mârâc jaha mâreŋ sawao homa bâfeŋnewec, iŋuc jaha Ŋic Fâri Wâtuŋne e bâfeŋnezo mukicne.
15 Eme e manasiŋkeniŋmu jaŋe juju sanaŋ bâfuaniŋmu.
16 Anutu e ŋic ŋoŋere mo iŋucne ecnewecte Ŋokâ jâmbâŋ‐ticne mocjaha e râe qikiŋ ecnewec. Eme e manasiŋkeniŋmu jaŋe moc mi sipirickehuc juju sanaŋ bâfuaniŋmu.
17 Ŋokâ e ŋic jaŋere kiŋ bataraocte mâcne, ŋic bâpiaŋ‐jopaocte Anutuzi soreme wahawec.
18 Moc e Ŋokâ manasiŋkekaczi okacnere biŋe mi ekac. Â moc e Ŋokâ mi manasiŋkekaczi ine biac okacnere biŋe ekac. Wemocte? E Anuture Ŋokâ jâmbâŋ mocjaha ere ʒâŋe mana maŋ mi ekac irec.
19 Okacnere fuŋne ʒiŋuc fokac: Tatamaczi ŋic maic‐jopame jaŋe tatamac bâsuerâ dapâcte wosâembiŋ, juju bapa‐jeŋic sâqocnere iŋuc hâcne embiŋ.
20 Moc e sindaŋ eocmuzi tatamac râpeckeocmu, juju bapa‐ticnere fuŋne jaŋgeŋkezacte wemocko tatamacko fua taniŋ eocmu.
21 Moc e dâŋ fâri qizecne reŋkeocmuzi ine tatamac maickeocmu, eme eebapa‐ticne Anuture micdâŋte sâcko ekicne irec fuŋne taniŋkeocmu.”
