13 Ŋic moczi sambâŋko moc mi fewec, Ŋic Fâri Wâtuŋne, sambâŋkonec wahawec, e mocjahazi sambâŋko wâc juekac.
14 “Mose e mârâc jaha mâreŋ sawao homa bâfeŋnewec, iŋuc jaha Ŋic Fâri Wâtuŋne e bâfeŋnezo mukicne.
15 Eme e manasiŋkeniŋmu jaŋe juju sanaŋ bâfuaniŋmu.
16 Anutu e ŋic ŋoŋere mo iŋucne ecnewecte Ŋokâ jâmbâŋ‐ticne mocjaha e râe qikiŋ ecnewec. Eme e manasiŋkeniŋmu jaŋe moc mi sipirickehuc juju sanaŋ bâfuaniŋmu.
17 Ŋokâ e ŋic jaŋere kiŋ bataraocte mâcne, ŋic bâpiaŋ‐jopaocte Anutuzi soreme wahawec.
18 Moc e Ŋokâ manasiŋkekaczi okacnere biŋe mi ekac. Â moc e Ŋokâ mi manasiŋkekaczi ine biac okacnere biŋe ekac. Wemocte? E Anuture Ŋokâ jâmbâŋ mocjaha ere ʒâŋe mana maŋ mi ekac irec.
19 Okacnere fuŋne ʒiŋuc fokac: Tatamaczi ŋic maic‐jopame jaŋe tatamac bâsuerâ dapâcte wosâembiŋ, juju bapa‐jeŋic sâqocnere iŋuc hâcne embiŋ.
20 Moc e sindaŋ eocmuzi tatamac râpeckeocmu, juju bapa‐ticnere fuŋne jaŋgeŋkezacte wemocko tatamacko fua taniŋ eocmu.
21 Moc e dâŋ fâri qizecne reŋkeocmuzi ine tatamac maickeocmu, eme eebapa‐ticne Anuture micdâŋte sâcko ekicne irec fuŋne taniŋkeocmu.”
22 Eme juku Jesu e motecfâcne rocjopame Jerusalem hae beherâ Judaia qaŋeŋnaopec ra jumbiŋ. Ira jaŋehec juhuc ŋic opâ rua‐jarewec.
23 Johane e mâreŋ moc ʒâŋene Ainoŋ, Salim haeopec juhuc iŋuc jaha Miti Opâ gie bawec, ira opâ bocjaha fowecte ŋic jaŋe fisipie rua‐jarewec.
24 Johane e dameŋ ira kâpâcwâru ficko mi râekicne.
25 Eme Judaŋic moczi Johane motecfâc‐ticne jaŋehec opâ ruruare mu qaqatarac embiŋ.
26 Eme motec jaŋe Johanerao rarâ ʒiŋuc âzâcnembiŋ: “Qaqazu, go Jordaŋ ocniŋucnao juhaŋtecne ŋic moc bâfuacgume fuŋne‐ticne mujaŋgeŋkerâ nâzâmeŋ, eki dameŋ ʒiŋuczia ŋic opâ rua‐jareme erao rafâreŋgopieŋ.”
27 Mupie Johanezi ʒiŋuc jazawec: “Ŋic moc e sambâŋ runezi wiac râcne tahac mi ehame e jahac wemocko kâŋgâc roocmu.
28 No kecʒiŋuc muhuc ŋazapo i wemocko mickeniŋmu, ‘No Kristo aricne, no biŋe mumu‐ticne sawa.’
29 Ŋokac biŋe mucnekicne eki hâcne ŋokac rune. Eme ŋokac bahuc ʒeri kâcɋene ʒeri eme âgo‐ticnezi manarâ bafickehuc bubiaŋ sâko bâfuaocmu wâc. Bubiaŋ i hâcne manapemurâ dameŋne maickekac ʒi.
30 Eki fua fehame noni pitiwazepac.
31 Faicnec wahaweczi qâhuc‐nâpo‐fârekac. Moc e mâreŋkonec fuakicnezi mâreŋte biŋe ekac â mâreŋkopec dâŋ muekac. Â sambâŋkonec wahaweczi ine qâhuc‐nâpo‐fârekac.
32 Eki wiac hone manac ewec irec dâŋ biŋe muekac. Mume ine ŋic jaŋe dâŋticne qikiŋneeŋgopieŋ.
33 Â dâŋticne mana maŋ ekac e Anutu mume sasanaŋ jukac dâŋ i dopeckekac.
34 Anutuzi ŋic sorewec eki Anuture dâŋ jaha muekac. Ŋic iŋucne e Anutuzi Mâro sâc tâmiric qikiŋnecneekac.
35 Mamac e Ŋokâ hone ririŋkehuc ere meo wiac sasawa râe‐fârewec.
36 Moc e Ŋokâ manasiŋkeocmu e juju sanaŋ ʒiŋuczia fuacnekac, â moc e Ŋokâre dâŋ bâsuehuc juocmuzi juju sanaŋ mi bâfuaocmu. Iŋucnere faio Anuture kimbeŋ feweczi foocmu.”
