8 Eme Pilato e dâŋ i manarâ mâretec hâwickewec.
9 Eme Jesu mocwâc ficmaŋko jowa ferâ indiŋkerâ muwec: “Go wenirec fuameŋ?” Mume Jesuzi micnao mi rowec.
10 Iŋuc eme Pilatozi ʒiŋuc âzâcnewec: “Go dâŋ mi nazakomec me? Noni mupe jucmu me mupe maripoŋko hâmocmu irec tâpiri râe‐narekicne, i mi manakic me?”
11 Eme Jesuzi ʒiŋuc âzâcnewec: “Mâc muzac go nore dâŋ wemocko munʒaŋ, nore dâŋ mumure faicnec tâpiri qikiŋne‐garekicnere mukomec hâcne. Irec gorao râecnukac ŋic ere kiŋzi gore jâurukac.”
12 Dâŋ i manarâ Pilatozi Jesu akickezo mume Judaŋic jaŋe owa ruruckerâ mumbiŋ: “Go ŋic e akickerâ Sisare âgo mocwâc mi jucmu. Moc e jahacnere ŋicwofuŋ muhuc Sisa âkehockeocmu.”
13 Pilatozi dâŋ i manarâ mume Jesu jowa wahapie dâŋ mumutara ŋeŋe‐ticnao waha ŋewec. Ŋeŋe i qânâ ʒaeo râekicne, eme ʒae irec ʒâŋe Judaŋic jaŋe Gabata mujumbieŋ.
14 Eme Judaŋic jaŋe hae fureme aakic hombaŋ ŋeniŋte teuŋko raʒimbiŋ. Ehame qâqâtâc bembeŋkeha Pilato e ŋeŋe‐ticnao ŋehuc Judaŋic ʒiŋuc jazawec: “Honeniŋ, ŋicwofuŋ‐ŋeŋic ʒi.”
15 Mume jaŋe owa ruruckerâ mumbiŋ: “E arictac eoc, e arictac eoc, maripoŋko feoc.” Eme Pilatozi muwec: “Hâc, eme ŋicwofuŋ‐ŋeŋic mupe maripoŋko hâmoocte muŋgopieŋ me?” Mume taha bapa micne jaŋe dâŋ ʒiŋuc bâtikiecnembiŋ: “Nâŋe ŋicwofuŋ‐nâŋec moc aricne, Sisa mocjahazi junârekac.”
16 Eme Pilatozi mana urue‐jarerâ Jesu maripoŋko hâmoocte qikiŋne‐jarewec.
17 Eme momori jaŋe Jesu rorâ maripoŋ râcnepie hâpome mâreŋ moc ʒâŋene Utusiec, Judadâŋko Goligata, ira barambiŋ.
18 Bararâ maripoŋko qambiŋ. Erâ sâqocne bapa jajahec mâmâc jofarâ moc ŋifec, moc ŋifec, â Jesu ʒâʒâŋiŋko, iŋuc biric‐jopambiŋ.
19 Eme Pilatozi mume Jesure qizec botâŋko maripoŋko qâreŋ kecʒiŋuc râembiŋ: “Jesu Nazarete haeonec Judaŋic jaŋere ŋicwofuŋ.”
20 Jesu qambiŋ mâreŋ i hae bembeŋko fowecte Judaŋic bocjahazi ira rac warec ehuc qâreŋ i wosembiŋ. Eme qâreŋ i Judadâŋko â Romadâŋko â Grikdâŋko râekicne.
21 Eme Judaŋic jaŋere taha bapa micne jaŋe Pilato ʒiŋuc âzâcnembiŋ: “Go Judaŋic jaŋere ŋicwofuŋ iŋuc mi qâreŋkec. E jahacne muwec, no Judaŋic jaŋere ŋicwofuŋ, iŋuc qâreŋkec.”
22 Eme Pilatozi muwec: “Qâreŋkepac izia fooc.”
23 Eme momori jaŋe Jesu maripoŋko qarâ ŋaqi‐ticne faine bâtâcnepie jahec â jahec eme ru sâc embiŋ. Â ŋaqi‐ticne maŋne hâfâ iŋucne oorâŋ fukicnere
24 ʒiŋuc mumbiŋ: “I bâtâcnepene sâqoreocmu, irec ɋâsâi qapene rune âke fuaoc.” Iŋuc epie miti papiao dâŋ moc kecʒiŋuc qâreŋkekicne i sanaŋkewec: “Jaŋe ŋaqi‐nane faine bâtâc bambiŋ, â maŋnere ine ɋâsâi qambiŋ.”
