Joan 5:8-18

⁸Ikantiri Jeso: —Atsi tinaanake ganaero pinoriantakarira piatae.

⁹Irorotyo ikantakerira ogatyo ikenake yovegapagenityo yaganairo inoriantakarira akya yanuitanai. Kantankicha ontitari kutagiteri apishigopireantaganirira,

¹⁰ikantaigutarityo itinkamiegi jorioegi: —Maika ontitari kutagiteri apishigopireantaganirira tera kameti pamanakera pinoriantakarira, okantavitantaganitari.

¹¹Irirori ikantaigiri: —Yogari vegaanarira irirotari kantakena: ‘Ganaero pinoriantakarira piatae.’

¹²Ovashi ikantaigakeri: —¿Tyanityora kantakempira?

¹³Kantankicha irirori teratyo irogote tyani vegairi, yapatovageiganakatari kara, yogari Jeso paa atai.

¹⁴Impogini Jeso ineairi ivankoku Tasorintsi ikantiri: —Maikari vegaavi, gara pimatairo aikiro pinkañovagetaempara. Pimataerorika aikiro omatashitanaempi pashini pairo ogagakempi.

¹⁵Irirori ishigamatanakatyo ikamantaigakerira itinkamiegi ikantaigakerira: —Iriroratyo vegaana Jeso.

¹⁶Ovashi ikisasanoiganakeri Jeso ikogaigavetaka irogaigakerimera ineaigakera yovegairira kutagiteriku apishigopireantaganirira.

¹⁷Kantankicha Jeso ikantaigiri: —Ariotari ikañotakari Apa irirori ikantakani yantavagetake, nokañotantakarorira naro aikiro omirinkara nantavagetake.

¹⁸Ariompatyo ikisasanoiganakari itinkamiegi jorioegi ikogasanoiganakera irogaigakerimera, ineaigakeritari tera intagati irovegantemparo kutagiteri apishigopireantaganirira, ontityo aikiro ikañotagumanatanakari Tasorintsi ikantakera inti tomintari.