9 Jasêsô bau e sêlic ja kêsa ma i to mo kêsa gêwiŋ.
10 Tec Jesu kêsôm gêdêŋ êsêac gebe “Akôc i, taŋ galoc alô naŋ, ŋagêdô amêŋ.”
11 Tec Simon Petere kêpi waŋ gêja ma gêjam jaôŋ wasaŋ, taŋ i kapôêŋ 153 sêwê e toŋoma naŋ, kêpi bau gêja, mago wasaŋ gêŋgic atom.
12 Go Jesu kêsôm gêdêŋ êsêac gebe “Amêŋ, aniŋ gêŋ bêbêcŋa acgom.” Nacseŋomi samob têtêc tauŋ e nêŋ teŋ katu kênac eŋ gebe “Aôm asa,” nec atom. Êsêac sêjala eŋgac gebe eŋ Apômtau.
13 Go Jesu kêkôc mo jakêkêŋ gêdêŋ êsêac ma i amboac tonaŋgeŋ.
14 Jesu gêdi sa aŋga ŋacmatênêŋ ma geoc tau lasê gêdêŋ nê ŋacseŋomi kêtu dim têlêacŋa tonaŋ.
15 Seŋ gêŋ su, go Jesu kêsôm gêdêŋ Simon Petere gebe “Joaŋ latu Simon, aôm têmtac gêwiŋ aê kêlêlêc êsêac tônê su me masi.” Tec Simon gêjô eŋ awa gebe “Aec, Apômtau, aôm kôjala gebe aêŋoc ŋalêlôm gêwiŋ aôm. “Ma Jesu kêsôm gêdêŋ eŋ gebe “Ojop aêŋoc domba ŋalatu.”
16 Go Jesu kêtu kênac eŋ kêtiam kêtu dim luagêc gebe “Joaŋ latu Simon, aôm têmtac gêwiŋ aê me masi.” Tec Simon gêIôc gêdêŋ Jesu gebe “Aec, Apômtau, aôm kôjalagac gebe aêŋoc ŋalêlôm gêwiŋ aôm.” Ma Jesu kêsôm gêdêŋ eŋ gebe “Ojop aêŋoc domba.”
17 Go kêtu kênac eŋ kêtu dim têlêac gebe “Joaŋ latu Simon, aômnêm ŋalêlôm gêwiŋ aê me masi.” Tec Peterenê ŋalêlôm ŋawapac kêsa, gebe kêtu kênac eŋ katu dim têlêac gebe “Aômnêm ŋalêlôm gêwiŋ aê me masi,” ma kêsôm gêdêŋ eŋ gebe “Apômtau, aôm kôjala gêŋ samob, aôm kôjala gebe ŋoc ŋalêlôm gêwiŋ aôm.” Ma Jesu kêsôm gêdêŋ eŋ gebe “Ojop aêŋoc domba.
18 Biŋŋanô, aê jasôm tobiŋŋanôgeŋ êndêŋ aôm gebe Aôm ŋapalêgeŋ, tec taôm kôjandiŋ nêm ômbiŋkap ma kôsêIêŋ gôja gamêŋ, taŋ gobe ôna naŋ. Ma embe otu ŋac laŋgwa, oc ôlam lêmam ma teŋ êjandiŋ aômnêm ômbiŋkap ma êwê aôm ôna gamêŋ, taŋ taôm godec gebe ôna atom naŋ.”
19 Jesu kêsôm biŋ tonaŋ gebe êtôc Peterene lêŋ êmac êndu ma êwaka Anôtônê ŋawasi saŋa. Kêsôm biŋ tonaŋ su ma keteŋ eŋ gebe “Ôndaŋguc aê.”
