40 Morara kary etaryke imoihmãkomo a ynara tykase toto, —Urutõ nymyry mosero Ritonõpo poe, tykase toto.
41 Imehnõ roropa ynara tykase, —Ritonõpo nymenekahpyry mosero, kukurãkanekõme, tykase. Yrome imehnõ roropa ynara tykase, —Ritonõpo nymenekahpyry kara mosero. Ritonõpo nymenekahpyryme ahtao Karirea po pyra enururu. Berẽ po enururu.
42 Ynara karyke Ritonõpo a, “Tawi paryme enurũko Ritonõpo nymenekahpyry. Berẽ po enurũko mana Jutea rãnao, Tawi esaryme Berẽ exiryke,” ãko Ritonõpo omiry, tykase toto.
43 Atae pyra toh toehse Jezu poko.
44 Imehnõ Jezu apoiry se toehse repe. Yrome anapoipyra tokurehse toto.
