7 Bulimakao â qowi mimicne bea jaŋe qâqâtec juhuc nânâ nâniŋmu; â motecfâc‐jeŋic jaŋe mâmâc ŋec foc eniŋmu; laioŋzi ine bulimakao iŋucne kecɋaŋ nâocmu.
8 Motec susuoneczi qotâ e jâchawecko foha masirickeocmu, â motec gegecnezi sopâc homa usuraŋkeocmu.
9 Tiri tiki mâreŋ‐nane ŋifec â ŋifec, ira bâbâʒâic â sisipiric moc mi fuaocmu; Wofuŋte fuŋne mamanazi mâreŋ fusucmaocmu, hâweczi ʒâkâŋ‐ticne bârârâŋne‐fâreekac irec sâc.
10 Dameŋ ira Isai gitecnezi qâpuc ŋicguru ma doma‐jareocmu, ma i bâfuaniŋte ŋicne ŋicne babasa gie baniŋmu, â fic hae‐ticne eri tatamacnehec ŋeocmu.
11 Dameŋ ira Wofuŋzi meticne harierâ sicneme arec 2 eocmu, ehuc ŋicfâc‐ticne tiwâne juraŋgopieŋ bârisiec‐jopaocmu; Asiriaonec, Aigitaonec, Patarosionec, Etiopianec, Elamkonec, Sinaonec, Hamationec â Hâwec mâreŋkonec nusec‐jopaocmu.
12 E qâpuc ŋicguru ma âkendâŋne‐jareocmu â Israe guruonec tuŋjopakicne qâzuc‐jopaocmu; ehuc mâreŋ qaŋeŋne 4 irecnec Judaŋic bâtâtiec‐jopakicne jaŋe qânusuc‐jopaocmu.
13 Eme Eferaimzi Juda iiŋguuŋ ecneekac i omaeocmu, â Juda qaisockeeŋgopieŋ jaŋe siroweniŋmu. Eferaimzi Juda iiŋguuŋ mi ecneocmu â Judazi Eferaim mi qaisockeocmu.
14 Jahe hâweckopec Filisa ŋic tiki‐jeŋicko ʒocnehec fenicmu, erâ ʒoaŋ wewefuopec ŋic fisi‐jarerâ mafa‐jeŋic jowac ronicmu. Erâ Edom â Moabi ŋicguru rauc‐jopanicmu, ehame Amoŋŋic jaŋe micjekic reŋkeniŋmu.
15 Eme Wofuŋzi Aigita mâreŋte hâwec raʒikicne i mume omae‐fâreocmu, erâ meticne Eufrata opâopec sicnehuc micrombâŋ fâronezi ficneme tâtiehuc opâ piticne 7 fuame ŋiczi fotâcnepie kike‐jeŋic mi bânâŋkeocmu.
16 Eme ŋicfâc‐ticne tiwâne juniŋmu jaŋere biŋe Asirianec hata sâko fua‐jareocmu, Israe ŋic Aigita mâreŋkonec warezo ehapie hata fua‐jarewec irec sâc.
