9 Kalono hae e Kakemisi hae ere sâc mi ewec me? Hamati hae e Arapada hae ere sâc mi ewec me? Samaria e Damasko ere sâc mi ewec me?
10 Menanezi ŋicguru jopapo jaŋere nemuɋâŋzi Jerusalemnec â Samarianec jaŋere siric‐joparâ kâcɋene domambiŋ, eme no sifu mi bâipiec‐jopapo.
11 Irec no Samaria â ɋâŋ qâqâtâcfâcne wiac ejarepo, sâc ijaha Jerusalem â nemuɋâŋfâcne mi ejarepemu me?”
12 Eme ʒiŋuc fuaocmu: Wofuŋzi Zioŋ tikio â Jerusalemko gie‐ticne batara‐fârerâ Asiria ŋicwofuŋ maŋfefe‐ticnere â pepec ʒâŋe fifi‐ticnere okacne râcneocmu.
13 E ʒiŋuc hâcne mukac: “No menanere tâpirizi gie i bapo â mamana fonarekacte maŋɋârâŋ‐nanezi epo; no ŋicguru mâreŋ‐jeŋicte ma bârâriepo â moneŋ mafa rowaŋ‐jeŋic omaepo, erâ eri ŋeŋeo ŋembiŋ jaŋe herândiŋ‐jopapo, i bulimakao ŋicnezi mâsi eekac irec sâc.
14 Ŋicguru jaŋere mafa mâriri rowaŋ i menanezi wawaŋ sesuc iŋucne bâfuawec; â ŋiczi wawaŋ hândâŋ ro amec eeŋgopieŋ, iŋuc mâreŋ sâc wiac ro nusec epo. Eme moczi moc fakecnezi qiriŋ mi qawec, me micne aŋkerâ dâŋ wâc mi dâŋewec.”
15 Hâc, ŋic nâŋâc râriczi jâc wiac qaeŋgopeneŋ, râric izi sâcne pepecne enâreocmu? Me sege baeŋgopeneŋ izi penaroŋ dâŋ muocmu? Hutizi wemocko ŋic rorâ fotarieocmu? Me ɋaruczi wiac jujune rorâ bâfeŋneocmu?
16 Irec Wofuŋ, Anutu Tâpiri Ɋuŋɋasaŋ Wofuŋ, e Asiria momori biuc sâkohec jaŋe hucsanaŋ sore‐jareocmu, â eri qaraweŋ‐jeŋic turuŋkeme bâruŋkerâ ʒoc iŋucne ʒaocmu.
17 Israe ere tatamac izi hâcne ʒoc eocmu, Tiriŋic‐ticne eki ʒocbâruŋ eocmu; erâ fâpâ uupic â sopâc‐jeŋic i ʒoaŋ mocjahao ʒarâ ʒâseŋkeocmu.
18 Eme jâckâte â jufu‐jeŋicte eri biaŋ i Wofuŋzi bâsiroweme fuŋgâtânehec omaeocmu, hucŋic moczi fofeku mâc omaeekac irec sâc.
19 Ekume jâckâte‐jeŋicte tiwâne jahec mac domaocmu, ʒarene motec piticne moczi wose qâreŋ eene.
20 Dameŋ ira Israe ŋic tiwâne â Jakobore kikefuŋ nâfocne jaŋe imac‐jopawec erao mocwâc mi roweckeniŋmu; mâcne, jaŋe Wofuŋ, Israere Tiri rune erao jâmbomacko roweckeniŋmu.
21 Tiwânezi risieniŋmu, Jakobore tiwânezi momori Anutu erao risieniŋmu.
22 Israe ŋicguruge hâwecte moŋgeŋ iŋucne sawe‐bipieniŋmuo sifu tiwâne sawa risieniŋmu. Ima bâroŋ mupaŋkekicne izi bâbâtiŋhec opâ rumi iŋucne fisiocmu.
23 Wofuŋ, Anutu Tâpiri Ɋuŋɋasaŋ Wofuŋ, eki mâreŋ sasawa ira ima bâroŋ fuaocte mupaŋkewec irec sâcko bâfuaocmu.
24 Irec Wofuŋ, Anutu Tâpiri Ɋuŋɋasaŋ Wofuŋ, e ʒiŋuc mukac: “O ŋicfâc‐nane, Zioŋko juŋgopieŋ, mârâc Aigita jaŋe ɋaruczi ŋopahuc kâcbiŋ fotarie‐ŋarembiŋ irec sâc Asiria ŋic jaŋe eŋarehapie mi hâwic‐ŋopazejec.
25 Dameŋ bembeŋne mac tarame kimbeŋ‐nane omaeocmu, eme aaric‐nanezi jaŋe bâsirowec‐jopaocte fahareocmu.
