4 Kâpâcwâru ŋic jaŋere guruo babarâ juju, me qâhâmoc‐jopakicne ŋondeŋ‐jeŋicko fofo, wiac i sawa fua‐ŋareocmu. Eme sifu kimbeŋ‐ticnezi mi qaʒue wahakac, â menezi mi betaŋkehuc qiŋ herâ domakac jaha.
5 Jei, Asiria e kimbeŋ‐nanere ɋaruc â aaric‐nanere kâcbiŋ ekac.
6 No ŋicguru sindaŋne jopaocte sorekopac, kimbeŋ‐nane hurembiŋ jaŋerao giedâŋ mucnekopac; e mafa‐jeŋic jowac rohuc huhure‐jeŋic rauckezejec, ro waha âte ejarekume hatao goteŋ iŋucne enʒepieŋ.
7 Eki ine iŋuc mi maŋkekac â maŋnezi iŋuc mi manasukac; e sisipiric gie baocte aŋackekac, â ŋicguru omaec‐jopaocte mukac i afecne mâcne.
8 E ʒiŋuc hâcne manasukac: “Micnefâc‐nane jaŋe ŋicwofuŋ sasawa i!
9 Kalono hae e Kakemisi hae ere sâc mi ewec me? Hamati hae e Arapada hae ere sâc mi ewec me? Samaria e Damasko ere sâc mi ewec me?
10 Menanezi ŋicguru jopapo jaŋere nemuɋâŋzi Jerusalemnec â Samarianec jaŋere siric‐joparâ kâcɋene domambiŋ, eme no sifu mi bâipiec‐jopapo.
11 Irec no Samaria â ɋâŋ qâqâtâcfâcne wiac ejarepo, sâc ijaha Jerusalem â nemuɋâŋfâcne mi ejarepemu me?”
12 Eme ʒiŋuc fuaocmu: Wofuŋzi Zioŋ tikio â Jerusalemko gie‐ticne batara‐fârerâ Asiria ŋicwofuŋ maŋfefe‐ticnere â pepec ʒâŋe fifi‐ticnere okacne râcneocmu.
13 E ʒiŋuc hâcne mukac: “No menanere tâpirizi gie i bapo â mamana fonarekacte maŋɋârâŋ‐nanezi epo; no ŋicguru mâreŋ‐jeŋicte ma bârâriepo â moneŋ mafa rowaŋ‐jeŋic omaepo, erâ eri ŋeŋeo ŋembiŋ jaŋe herândiŋ‐jopapo, i bulimakao ŋicnezi mâsi eekac irec sâc.
14 Ŋicguru jaŋere mafa mâriri rowaŋ i menanezi wawaŋ sesuc iŋucne bâfuawec; â ŋiczi wawaŋ hândâŋ ro amec eeŋgopieŋ, iŋuc mâreŋ sâc wiac ro nusec epo. Eme moczi moc fakecnezi qiriŋ mi qawec, me micne aŋkerâ dâŋ wâc mi dâŋewec.”
15 Hâc, ŋic nâŋâc râriczi jâc wiac qaeŋgopeneŋ, râric izi sâcne pepecne enâreocmu? Me sege baeŋgopeneŋ izi penaroŋ dâŋ muocmu? Hutizi wemocko ŋic rorâ fotarieocmu? Me ɋaruczi wiac jujune rorâ bâfeŋneocmu?
