33 Dinokogan das sak-en yan olay mo kanayon ay itdoak daida, adi da dengngen ya adi da ipatpati di pamagbaga.
34 Inpeey da din kaliliget ko ay didiyosen da sin Timplo ay kaidaydayawak et inpakadodogis da.
35 Nan-amag da abe si altar para en Baal sin Tanap ay Ben-hinnom. Isdi ay indaton da din aan-ak da en Molek ay didiyosen. Adiak inbilin dana ay amagen da ya adiak polos ninemnem dana ay kadodogis ay panbasbasolan di ipogaw ed Juda.”
36 Kanan Yahweh ay Diyos di Israelita, “Inbagbagam sin ipogaw ay abaken din taga-Babilonia din siyodad ay nay et matey da si gobat, betil ya kaeegyat ay sakit. Ed wani, dengngem din ibagak.
37 Awni et alaek daida sin inil-ili ay pangipaaddawiak en daida. Pansisianek daida gapo sin palalo ay bonget ko, ngem asiak itaolis daida isnan ili ay nay ta natalna di biyag da.
