36 Tialima, Genuai Bidigo te tiwai po wai, “Jerusalem, odao. Mu tama, te eno nage tau selama, te Babilon dabego nageba yali dwai sę dabe wei ponaibao. Eno te Babilonde elalubo wę tigidali sula somainogo yaibao.
37 Eno te Babilon dolama, te masigi du holali pesage naga elalueibao. Te uni yowi dabego bulu pesage dabe naga elalueibao, te bidi tede meni yaibao. Te gasa hani bidi dabego subo sogo da, te augwali dwai noma mu selama, te wi umabo mu yaibao. Augwaligo te Babilonba kęnę po waibao.
38 Tama te Babilon dabego i dwai mu weyu, te gesi hasa laiongo i wabo tiwai gilama ebo dao.
39 Tialima, ena Genuai Bidi, eno po dolo obao, te augwaligo dwai kolesaga yabo haliga hogodobo sogo da, te eno genuai nai tuabo daa me deli pedelama, te augwa ąį hauwa tulama, gęǫ eyu, pemene eyu, i hae weyu yaibao. Te nosali augwali mu godege pilama, te augwali munu ma hodalugobeo.
40 Te eno augwali te ela muabo pesageba odasa paibao, te bidigo te omai sipsip dabe, me meme dabe, augwaliba ebo tiwai gilama yaibao,” po wai dao.
41 Genuai Bidigo e tiwai po wai, “Tigidali tǫde we bidi hanigo Babilonba genuai nogi mawai, tiali goli, te boi bidi dabego hwįagaselama, saibao. Te gasa hani we bidi dabego subaso da, te augwali midigi dwai mu saibao.
42 Te boi bidi augwaligo Babilon halua saibao, te tamu ąį dinigo te ąį sane mesega sabo tiwai yaibao.
43 Te agai taun dabe tigidali mu dolama, te bulu tǫ kantri olo masigi kemi bulu pesage tiwai pedelaibao. Tama bidi me bidalugobeo, tama bidi augwali tede munu me biligobeo.
44 Eno te Babilongo tibo god, te Belba dwai dene mabo sę eyu, te eno agai te dalali nai dabe bugulabo sę ilaibao. Tama te tǫ kantri we bidi augwali agaba me asogobeo. Tama te Babilon bagulali genuai obo te tigidali pepeda paibao,” te po wai dao.
45 “Dage eno we bidi dabe, duga te Babilon tagalama, wi pao. Dage deli deli wi pobaso da, te dage bugagia bidaibao. Ena Genuai Bidigo eno haliga sębę dwai mu te Babilon dabeba ebao, tama tiyu, eno dage augwali dali dolabuo.
46 Dagego haliga dwagila midigi selama, dage te tǫde haniani po dabe sabilibo odama, te dage wi me igio. Te kibu be me delide gasa po pedalu, te gasa kibu bede gasa po pedalu yaibao. Te genuai boi hwįbao weyu, te king mego te gasa kingba hwįbao te po augwaligo waibao.
47 Magi baso meni. Eno bodolu muani sogo me deli elalubao, tama te sogoba pedalubo si da, eno te tǫ kantri Babilongo tibo god piksa dabego elalubo nogi dolaibao. Te tǫ kantri Babilon hale dwai mu yaibao. Te boi bidi dabego te Babilon bidi hauwa ela munama, augwaligo tigi te Babilon bulu tǫde munalua paibao.
48 Te ena Genuai Bidi, eno obao, te sogo dagalu dali tǫ sigo te augwalide elalubo tigidali naigo te Babilon tulalubaso, wiegi yai pemene mu yaibao. Te haniani nai dabe dolabo bidi, augwali te not badu bidali tagalama asu, te Babilonba hwįagasaibao,
49 tama Babilon dolabo sę ebo te aga digi dage Israelbolo yali, me te gasa tǫ badu hani dabe yali kolesaga tiwai si te agabolo wei ponaibao,” te po wai dao.
50 Tialima, te Babilon augwaligo dage dolisąwani Israel, dage polo asesą Babilon tagalama, wi pao. Mu tama, duga page bulu digibulu elaluali, tiali goli, te dagego Genuai Bidiba homu kone palama, te dagego Jerusalem homu kone ebo homu me gegeda paligio.
51 Megi da, dagego e tiwai po obao, “Da hale dwai mu yalio. Magi baso meni. Te bulu tǫ kantri bidi dabe augwali te Genuai Bidigo Tedali Gasagi Yai Mu Be Habu tomoba pai. Te augwaligo dabolo po dwai wali. Tibaso, da hale dwai mu ebao.” Megi dagego te tobage po obao.
52 Genuai Bidigo e tama po wai, “Awe, megi te tiwai elalubao. Tiali goli, eno bodolu muani sogo me deli elalubao, tama te sogo pedalubaso da, teda te sogo eno te tǫ kantri Babilon tibo god piksa dabego elalubo nogi dolaibao. Te tigidali Babilon habu badu te boi hwįyu, bidi hauwa dolobaso, te augwali gela wabo umagi mu yaibao,” te po wai dao.
53 “Babilon te dagaluba ugwanu dąį mu igulama, te boi hwįbo bomai pesage nigali da, tagalao, eno te nai dabe dolabo bidi augwali tagala palama, te augwaligo aga doligi dao. Ena Genuai Bidi, eno te po wai dao,” wali.
54 Te Babilonde genuai gela u pedelaibao. Te boi bidi dabego te tǫ kantri mu dolama, te genuai u wabo pedelaibao.
55 Genuai Bidigo te Babilon mu doliyu, te Babilongo genuai u wabo mu silaibao. Te boi bidi hauwago te Babilonba hwįagaselama, te kulukulu genuai mu pedelama, te genuai tamu ąį dini dabego bugusu wabo tiwai yaibao.
56 Te nai doado bage dolabo bidi dabe, augwaligo te Babilonba boi hwįagaselama, augwali aiyaba elaluaibao. Tama augwaligo te Babilon ami bidi dabe kalabus elama, te augwaligo enesigi dabe tologwaibao. Magi baso meni. Genuai Bidi aga te dwai sę ebo dolo wei ponobo God dao. Tama tibaso, mu tama, agai te Babilon dabego dwai kolesaga usu siyu, dolo mu wei ponaibao.
57 Te king, agai nogi da Tigidali Bomo Elalubo Genuai Bidi dao, agai te tama po wali, “Eno te Babilon genuai bidi dabe gęǫ page ilaibao, te ofisa bidi dabe, me kolesaga koneai bidi dabe, me gavman bidi dabe, me tobolu bidi dabe, me ami bidi dabe, te kolesaga umuna palobo sę ilaibao. Te augwali mu godege pilama, te munu ma hodalogobeo.
58 Ena Genuai Bidi, eno tigidali bomo elalubao, eno obao, te boi bidi dabe augwaligo te Babilon bagulali obo tai nidigi pali alulama, te deli me elalugobeo. Tama augwaligo te taun tomoba piduali genuai bobobage sunumi isigo ulaibao. E tiwai dao. Tigidali hani we bidigo odolali sę dene yali. Te augwaligo nigali nai tigidali te isigo daibao,” te po wai dao.
59 Te kibu be me si me side te Sedekaia Juda king bidali sogo, Jeremaiago po me deli Babilonba ola tolali. Te sogo king Sedekaia Babilonba pai hagede yali, te Seraia, aga ofisa me deli, te aga dali painogo yali. Seraia aga te Neriago ogwa, te Maseago wąį nǫų dao. Tama Jeremaiago po Seraiabolo mawai dao.
60 Jeremaiago te dwai sę tigidali Babilonba pedelabo po asęai, te Genuai Bidigo agaba mani po dabe dao.
61 Tialima, Jeremaiago Seraiabolo e tiwai po wai, “Nage te Babilonba sabalobo sogo, nago te po tigidali te we bidiba nedao,” wali.
