Jan Laabaalihamo 11:20-49 in Gourmanchéma

²⁰ Malata n den gbadi ke Jesu kpendi, o den ñani ki tuogi o, ama maliyama den kaa li dieli nni.

²¹ Malata den yedi Jesu: o Diedo a ya den ye ne yo, n ciamo kan den kpe.

²² Ama baa moala, n bani ke han mia U Tienu yaala kuli o baa tieni apo.

²³ Jesu den guani ki yedi o: Aciamo baa fii bi tinkpiba siiga.

²⁴ Malata den guani ki yedi o: N bani ke obaa fii, bi tinkpiba fiima li juodi daali wani. Jesu den yedi o:

²⁵ Mini tie bi tinkpiba fiima leni limiali. Yua n daani nni, baa ya kpe o go baa fo.

²⁶ Yua n daani nni ki fo mo kan kpe hali a bada. A dugi laa maama po bi?

²⁷ Malata den yedi o: Mm, o Diedo n daani ke a tie U Tienu n gandi yua, U Tienu bijua yua n den baa cua handuna nni.

²⁸ Wan den yedi yeni, o den gedi ki ban yini owaalo Maliyama hasiili nni, ki yedi o: Canbaa, cua o yi ha.

²⁹ Maliyama n den gbadi lani o den fii tontoni ki gedi Jesu po.

³⁰ Kelima Jesu daa den kua udogu nni, o da den ye Malata n den tuogi o naankani yene.

³¹ Yaa Jufinba n den ka leni Maliyama deeni, ki baagidi o, n den laa ke o fii tontoni ki ñani yeni bi den huadi o, ki tua: O caa likuli po ki baan buude.

³² Maliyama n den pundi, ki laa Jesu o den gbaani o taana kani ki yedi o: O Diedo a ya den ye ne yo, n ciamo kan den kpe

³³ Jesu n den laa ke wani leni yaa Jufinba n yegi kuli buudi. Li paboanli den cuo o, hali boncianla ke o fuo ki jiini.

³⁴ O den buali ba, yi piini o le yo? Bi den yedi o: O Diedo cua ki ban le.

³⁵ Jesu den buudi.

³⁶ Lanyaapo, Jufinba den yedi: Diidi mani wan den bua o, maama.

³⁷ Bi siiga bi tianba den yedi: Wani yua n yen nuadi bi niba, naani o kan den fidi ki teni ke o joa ne kan kpe?

³⁸ Li paboanli go den cuo Jesu ke o fuo ki jiini. O den pundi li kuli kani. Li kuli yeni den tie tanlongu ke tangu bii bu ñoabu. Jesu den yedi:

³⁹ Pigidi mani ku tangu. Malata yua n kpe yeni, naantaanpuoga den yedi o: o Diedo li baa sua ke o nuugi, kelima hali ban piini o, dinla n koa dana naa. Jesu den yedi o:

⁴⁰ Mii yedi a, ke a ya daani a baa le U Tienu kpiagidi?

⁴¹ Bi den ñani ku tangu. Jesu den yaadi ki nuali tanpoli ki yedi: N Baa n tuondi a, kelima a guani n miabu.

⁴² Mini n ba wani, n bani ke yogunu kuli a goangi n miabu, A ma n maadi yaa niba n gaani ki lindi nne yaapo yo, ke ban daani ke fini n soani nni.

⁴³ Wan den yedi yeni, o den kpaani o nialu ki yedi: Lasala ña.

⁴⁴ Yua n kpe yeni den ñani ke acaba finfini o nii leni o taanakuli, ke cabiyenli mo fini o nunga, Jesu den yedi: Findifindi o mani ki cedi wan gedi.

⁴⁵ Yaa Jufinba n den cua Maliyama kani, ki laa Jesu n tieni yaala yeni, siiga boncianla den tuo ki daani Jesu.

⁴⁶ Ama bi siiga bi tianba den gedi ki ban waani Falisieninba, Jesu n tieni yaala.

⁴⁷ Lanwani bi kopadicianba yudanba leni falisieninba den taani, bi cancannikpeliba ki yedi: Ti baa tieni lede? Kelima o joa yeni tiendi mi bancianla boncianla.

⁴⁸ Ti ya cedi ke o tiendi yeni bi niba kuli baa daani o, yeni mo Loma yaaba baa cua ki bolinni ti dogu leni ti buolu.

⁴⁹ Bi siiga nni yendo yua n yi Kayifa, ki tie bi kopadicianba bado laa binli den yedi ba:

²⁰ Lan ya yognu ki Marti gbadi ki jesu pundi, k o hedi o liigi bo, l bo sua ki Mari kaa o bulñɔbu nni

²¹ Marti maadi Jesu: yonbidaan a ya bo ye ne, n ninjua bo kan kpe.

²² Ama, yeni lan ya kuli, n bani k a ya buali yaali ti Diedo, ti Diedo ba teni a.

²³ Jesu ŋmiani o: a ninjua bu yiedi.

²⁴ N bani, Marti ŋmianio, o bu yiedi li daajijuogi daali.

²⁵ Jesu maadi: min tie o yiedo, ki tie li miali. Yua pia li dandanli ki duu n po bu la li miali, ba o ya kpe;

²⁶ yua fuo ki dug n po, kan bangi ki kpe. A dug li po i?

²⁷ Ke o maadi o: Nn, yonbidaano, n bani ke a tie Kiristo, U Tienu bijua, yua ba cua li ŋandunli nni.

²⁸ Wan yedi lani, ke o siedi ki gedi ki ban yini o ninsalo Maari suoo. Ki yedi o, “Canbáa cua, ki yi a.”

²⁹ Wan gbadi lani, ke o kudi ki fii, ki gedi o kani.

³⁰ Li yognu, ke Jesu da ki pundi u dogu nni, ki da li ye Marta ń tuogi o naankani yeni.

³¹ Juufinba yaaba n bi ye yeni o li dieli nni, ki baagi o yeni ń la ke o kudi ki fii, ki ñani yeni, ke bi ŋɔdi o, ki maali ke o caa li kakuli kani ki baa buudi i.

³² Maari ń cua Jesu ń ye naani, ki la o, ke o baa ki gbaani o taana po, ki yedi o, “O Diedo, a ya bi ye ne i, n ninjua bi kan kpe.”

³³ Jesu ń la ke Maari buudi ke juufinba mo buudi, ke mi maalma kua o, ke o yama ŋmadi;

³⁴ Ke o maadi, “I piini o le i?, ke bi maadi o, “O Diedo, cua na ki diidi.”

³⁵ Jesu bo buudi.

³⁶ Ke juufinba yedi, “Diidi mani wan den bua Lasaari maama!”

³⁷ Ama ke nitianba maadi, “Ya nilo n luodi yua n mali juamo yeni, bi kan fidi ki cedi o nilo ń da kpe ee?”

³⁸ Ke li bonli kua Jesu, ke o gbanu dá li ŋɔa, ke o gedi li kuli kani. Li den tie tanfalu i, ke ku tangu bii bu bulñɔbu.

³⁹ Ke Marta, o kpiemo ninsalo yedi Jesu, O Diedo, ya yognu ne o nuugi o, tin pii o, dana na n yeni.

⁴⁰ Ke Jesu yedi o, “N ki yedi a ke a ya dugi n po, a ba la U Tienu kpiagdi ii?”

⁴¹ Ke bi biidi ku tangu, Ke Jesu yaadi ki diidi poli, ki yedi, “N Báa, N tiendi a balga yeni ŋan cengi n maama.

⁴² N bani ke a li cengi n maama yogu kuli, ama, li tie ku niwulgu yugu n taani ki lindi nni ne penio i ke n maadi yeni, ke ban la ki dugi ke fini n sɔni nni.”

⁴³ Wan yedi lani, ke o tandi ki maadi, “Lasaari, Fii ki ña na!”

⁴⁴ Ke o kpiemo fii, ki ñani; ke o nui yeni o taana fiini a caba, ke li cabli bobni o nunga. Ke Jesu yedi ba, “findi findi mani o, ki ŋa wan ya caa.”

⁴⁵ Lani ke juufinba boncianli yaaba n bo cua Maari kani, ki la Jesu ń bo tieni yaali, ji bo dugi o po.

⁴⁶ Ama, nitianba guani ki lebdi farisienba kani, ki togdi ba Jesu ń tieni yaali.

⁴⁷ Lanyapo i ke salga yidkaaba yudanba yeni farisienba taani yikodanba tantaanli, ki yedi, “Ti ba tieni ledi i? O nilo ne tiendi yaalidgu bona boncianla

⁴⁸ Ti ya ŋa o yeni, ke o tie wan bua yaali, bi niba kuli baa dugi o po i; Roma yaaba ba cua ki fie ti tinfanma yeni ti dogtieba i.”

⁴⁹ Ama, ke nilo ye bi siiga ki yi Kayifa, ki tie lanyognu salga yidkaaba yudaano, yedi ba, “Yi ki bani libakuli.