1 Pal o duj dživesa sas o bijav andro gav Kana Galilejsko a sas ode e daj le Ježišoskeri.
2 O Ježiš sas vičimen pro bijav peskere učeňikenca.
3 Sar imar lenge dodžalas e mol, phenďa e daj le Ježišoske: “Nane len mol.”
4 O Ježiš lake phenďa: “So man the tut andre oda, džuvľije? Mek na avľa miri ora.”
5 Paloda leskeri daj phenďa le sluhenge: “Savoro, so tumenge phenela, keren!”
6 A ačhenas ode šov barune kanti pro paňi, hoj pes o Židi te thoven (moren) pal lengeri tradicija. Andre dojekh rešľolas vaj po šel ľitra.
7 O Ježiš lenge phenďa: “Pheraren o kanti le paňeha!” A pherarde len dži upre.
8 Paľis lenge phenďa: “Len andral a ľigenen oleske, ko ľidžal o bijav.” A ľigende.
9 Ov na džanelas, khatar sas, ale o sluhi, save ile le paňestar, džanenas. Avke sar koštoľinďa o paňi, so sas čerimen pre mol, vičinďa peske le ternes
10 a phenďa leske: “Dojekh manuš thovel pro skamind ešeb (peršo) e lačhi mol a sar imar buter pile, paľis del e goreder. Ale tu mukľal e lačhi mol dži akana!”
11 Kada ešebno zazrakos, so o Ježiš kerďa, pes ačhiľa andre Kana Galilejsko. Avke sikaďa peskeri slava a leskere učeňika andre leste pačanďile.
12 Paloda geľa andro Kafarnaum peskera daha, peskere phralenca the učeňikenca a ačhile ode vajkeci dživesa.
13 E Patraďi le Židengeri sas pašes a o Ježiš džalas andro Jeruzalem.
14 Ode andro chramos arakhľa olen, save bikenkerenas le gurumňen, bakren the holuben the olen, save vatinenas o love.
15 Kerďa peske le špargendar bičos a tradňa savoredženen le bakrenca the gurumňenca avri andral o chramos. Olenge, save vatinenas o love, previsarďa o skaminda a rozčhiďa o love.
16 Olenge, save bikenkerenas le holuben, phenďa: “Ľidžan kada adarik het! Ma keren mire Dadeskere kherestar pľacos!”
17 Leskere učeňikenge avľa pre goďi, hoj hin pisimen: “O kamiben vaš tiro kher andre mande labol sar jag.”
18 Akor leske o Židi phende: “Sikav amenge varesavo zazrakos, hoj te džanas, hoj tut hin autorita kada te kerel.”
19 O Ježiš lenge odphenďa: “Čhiven tele kada chramos a tel o trin džives les pale ačhavava.”
20 Akor phende o Židi: “Saranda the šov (46) berš ačhavenas kada chramos a tu les ačhaveha tel o trin džives?”
21 Ale ov oda vakerelas pal o chramos peskere ťeloskero.
22 Sar imar ušťiľa andral o meriben, o učeňika peske leperde, hoj oda phenďa, a pačanďile andro Pisišagos the leskere laveske.
