9 Sar doavle paš o brehos, dikhle rozthode kerade angara a upral sas thoďi e riba the o maro.
10 O Ježiš lenge phenďa: “Anen ole ribendar, so akana chudľan.”
11 O Šimon Peter geľa a cirdňa e sita pre phuv. Andre sas pherdo bare ribi, šel penda the trin (153), ale choc sas kajci but, na čhinďiľa e sita.
12 Paľis phenďa o Ježiš: “Aven, chan!” Ňiko le učeňikendar pes na tromanďile (na odvažinde) lestar te phučel: “Ko tu sal?” Bo džanenas, hoj oda hin o Raj.
13 O Ježiš avľa a diňa lenge o maro the e riba.
14 Kada sas imar tritovar, so pes sikaďa o Ježiš peskere učeňikenge, kanastar ušťiľa andral o meriben.
15 Sar imar dochale, phenďa o Ježiš le Šimonoske Peteriske: “Šimon, čhavo le Janoskero, kames man buter sar kala?” Ov leske phenďa: “He, Rajeja, tu džanes, hoj tut rado dikhav.” O Ježiš leske phenďa: “Pasin mire bakroren!”
16 Pale leske phenďa: “Šimon le Janoskero, kames man?” Ov leske phenďa: “He, Rajeja, tu džanes, hoj tut rado dikhav.” O Ježiš leske phenďa: “Starin tut pal mire bakrore!”
17 Tritovar leske phenďa: “Šimon le Jonašiskero, rado man dikhes?” Akor ačhiľa smutno o Peter, hoj lestar tritovar phučel: “Rado man dikhes?” A phenďa leske: “Rajeja, tu džanes savoro! Tu džanes, hoj tut rado dikhav.” O Ježiš leske phenďa: “Pasin mire bakroren!
18 Čačes, čačes phenav tuke: Sar salas terneder, phandehas tut korkoro a džahas, kaj kamehas. Ale sar phuroha, nacirdeha tire vasta a aver tut phandela a ľidžala tut ode, kaj na kameha.”
19 Oleha o Ježiš diňa le Peteriske te džanel, save meribnaha oslavinela le Devles. Sar oda phenďa, prikazinďa leske: “Av pal ma!”
20 O Peter visaľiľa a dikhľa, hoj džal pal leste o učeňikos, saves kamelas o Ježiš a savo paš o chaben geľa pašeder ko Ježiš te phučel: “Rajeja, ko tut zradzinela?”
21 Sar les o Peter dikhľa, phenďa le Ježišoske: “Rajeja, so ela kaleha?”
22 O Ježiš leske phenďa: “Te kamav, hoj te ačhel, medik na avava, so tut andre oda? Tu av pal ma!”
