1 Paľis pes pale sikaďa o Ježiš le učeňikenge paš o Tiberijadsko moros. Ačhiľa pes kavke:
2 Sas jekhetane o Šimon Peter, o Tomaš, saves vičinen Didimos, o Natanael andral e Kana Galilejsko, o duj čhave le Zebedeoskere the duj aver leskere učeňika.
3 O Šimon Peter lenge phenďa: “Džav te chudel ribi.” Phende leske: “Džas the amen tuha.” Avke bešle andre loďka a odgele, ale odi rat na chudle ňič.
4 Sar vidňisaľolas, ačhelas o Ježiš paš o paňi, ale o učeňika na džanenas, hoj oda hino Ježiš.
5 O Ježiš lenge phenďa: “Čhavale, chudľan varesave ribi?” On odphende: “Na!”
6 Ov lenge phenďa: “Čhiven e sita pre čači (pravo) sera la loďkake a chudena.” Avke čhide a chudle ajci but ribi, hoj e sita aňi na birinenas te cirdel avri.
7 Akor phenďa oda učeňikos, saves kamelas o Ježiš, le Peteriske: “Oda hin o Raj!” Sar šunďa o Šimon Peter, hoj oda hin o Raj, urďa pre peste uprune gada, so angloda čhiďa tele, a chučiľa andro moros.
8 O aver učeňika avle pre loďka a cirdenas pal peste e sita le ribenca, bo na sas dur la phuvatar, vaj šel (100) metri.
9 Sar doavle paš o brehos, dikhle rozthode kerade angara a upral sas thoďi e riba the o maro.
10 O Ježiš lenge phenďa: “Anen ole ribendar, so akana chudľan.”
