19 Kada hin oda, so svedčinel o Jan, sar ke leste o Židi bičhade andral o Jeruzalem le rašajen the le Leviten, hoj te phučen: “Ko tu sal?”
20 Na garuďa andre a phenďa avri: “Me na som o Kristus.”
21 A phučle lestar: “Ko akor sal? Či sal tu o Eliaš?” Ov phenďa: “Na som.” “Abo sal oda prorokos?” Odphenďa: “Na.”
22 Androda leske phende: “Akor, ko sal? Hoj te džanas te odphenel olenge, save amen bičhade. So pal tute phenes?”
23 Phenďa oda, so pisinďa o prorokos Izaiaš: “Me som o hangos, so vičinel pre pušťa: ‘Rovňaren avri o drom le Rajeskero!’ ”
24 Maškar o manuša, save sas pal leste bičhade, sas the Farizeja.
25 On lestar phučle: “Soske akor boles, te na sal tu o Kristus aňi o Eliaš aňi oda prorokos?”
26 O Jan lenge odphenďa: “Me bolav le paňeha, ale maškar tumende ačhel oda, kas tumen na prindžaren.
27 Ov hin oda, ko avel pal mande, ale me na som hodno leske te rozphandel o sirimocis pro sandalki.”
28 Oda pes ačhiľa andre Betanija pal o Jordan, kaj o Jan bolelas.
29 Pre aver džives dikhľa o Jan le Ježiš, hoj avel ke leste, a phenďa: “Dikh, o Bakroro le Devleskero, savo odlel o binos le svetostar!
30 Kada hin oda, pal kaste me phenďom: ‘Pal mande avel murš, savo hin angle ma, bo sas sigeder sar me.’
31 Aňi me les na prindžaravas, ale vašoda avľom a bolavas le paňeha, hoj les o Izrael te sprindžarel.”
32 O Jan svedčinelas: “Dikhľom le Duchos te avel sar holubica tele andral o ňebos a ačhiľa pre leste.
33 Aňi me les na prindžaravas, ale oda, ko man bičhaďa te bolel le paňeha, mange phenďa: ‘Pre kaste dikheha te avel tele le Duchos a hoj ačhel pre leste, oda hin ov, savo bolel le Sentne Duchoha.’
34 Me dikhľom a svedčinav, hoj kada hino o Čhavo le Devleskero.”
35 Pre aver džives ode pale ačhelas o Jan the duj leskere učeňika
36 a dikhľa le Ježiš, sar odarik pašal predžal, a phenďa: “Dikhen, o Bakroro le Devleskero!”
37 Ola duj učeňika šunde, so phenďa, a gele pal o Ježiš.
