13 Akana džav ke tu a kada phenav, medik som andro svetos, hoj miro radišagos len te el pherdo andro jile.
14 Me lenge diňom tiro lav a o svetos len našťi avri ačhel, bo nane andral o svetos, avke sar me na som andral o svetos.
15 Na mangav, hoj len te les andral o svetos, ale hoj len te chraňines le nalačhestar.
16 Nane andral o svetos, avke sar me na som andral o svetos.
17 Sentňar len tire čačipnaha! Tiro lav hin o čačipen.
18 Avke, sar tu man bičhaďal andro svetos, the me len bičhaďom andro svetos.
19 Vaš lenge me man oddav tuke, hoj the on čačes te en oddine.
20 Na mangav ča vaš kala, ale mangav the vaš ola, save prekal lengere lava pačana andre mande,
21 hoj te en savore jekh. Avke sar tu, Dado, sal andre ma a me andre tu, kavke mi en the on andre amende, hoj o svetos te pačal, hoj tu man bičhaďal.
22 E slava, so man diňal, diňom lenge, hoj te en jekh, avke sar amen.
23 Me andre lende a tu andre mande, hoj te en jekh andre savoreste, hoj o svetos te džanel, hoj tu man bičhaďal a hoj kames len avke, sar man kames.
24 Dado, kamav, hoj ola manuša, saven mange diňal, te en manca ode, kaj som me, hoj te dikhen miri slava – e slava, so mange diňal vašoda, hoj man kamehas mek sigeder, sar sas o svetos stvorimen.
