1 Te hanu Arat tuni bidi te Kenan hani bidi, tama agai hanu te Kenan bulude saut badu elalubo. Te tuni bidigo te Israel dabe te Atarim bulu sunumidu asobo po odali. Tama tialima, te tuni bidi aga hani ami bidi dabe dali augwali te Israel dabe dali hwįgi pali. Tama augwaligo Israel hani bidi meba toulama, odasa pali.
2 Tialima, Israel dabe augwaligo Genuai Bidibolo bomo yai po deli dąų walali. Augwaligo e tama po wali, “Te nago dago te bidi hani dolomainogo sula tagaliyu da, teda dago te we bidi sese me, augwaligo hanu me, dago dola silama, te ofa nai tiwai nagebolo mabo tiwai me yaibao,” te po wai.
3 Tama te Genuai Bidigo augwaligo po odama, tama augwali tau selama, te Kenan dabe te Arat hanu dolomainogo yali. Tialima, te Israel dabego te Kenan dabe augwa hanu dabe dali mu dolama tagalali. Tama augwaligo te bulu Horma polali.
4 Te Israel dabe augwaligo te Hor bulu du tagalama, te Akaba bulu badu te Retsi mama tamu wędu pabo sunumidu pali. Magi baso meni, augwaligo Idom tǫ taga painogo. Augwali pali pali dobaso, augwali sunumide hagela mu yali.
5 Tama augwaligo Godibolo me Moses dali augwaligo wado po wali. Augwaligo e tama po wali, “Magi baso dagego da Isipde oda selama, e nai meni yai buluba odasa asaliwe? Da te nai meni yai kemi sane bulude isimainu yaliwe? Te bulude nai mu menio. Tama dago te dwai nai mana da, dago hagela mu yalio,” te po wai.
6 Augwaligo te wado po wabo Genuai Bidigo odali. Tama Genuai Bidigo dwai gula mani dabe taga palali, te Israel dabeba, tama te gula mani dabego te we bidi hauwa gąǫ kelama isilali.
7 Tama te we bidi te Moses pageba aselama, e tama po wali, “Dago sęgę polo salio, te dago Genuai Bidi dali, me nage dali wado po walide. Megi nago Genuai Bidibolo gedu haluasa po wao, agai te gula mani sela sąmainao,” wali. Tama Mosesgo te we bidi tau somainogo Genuai Bidibolo gedu haluasa po wali.
8 Genuai Bidigo te gedu haluasa po wabo odama, tama agai Mosesbolo e tama po wali, “Nago te dwai gula manigo noma me nigilama, tama moni bobobage pos nide walao. Tama te mena we bidi augwali te gula manigo gąǫ kelali da, augwaligo te gula mani nomaba tonobode augwali me isigobeo. Menio, augwali usu ma yaibao,” te po wai.
