6 Ae lalona amo ela bona kwara asi namona ta; a rara aru-kubou bona toto, bona e raramu berodia; rara se hadodoa, bero se kumidia, bona dehoro amo se haḡavedia.
7 Emui tano vada e vahu, emui hanua na lahi ese e aradia; umui vaira-tuhutuhumui ai idau taudia ese emui tano anidia vada e ha-oredia ia na vada e ḡaḡae, idau taudia ese vada e havahuraia.
8 Siona natuna hahinena na e nohomu, kalaga vine imeana lalonai na heto, rumaruma kiukamba umana ai na heto, e koua heḡeḡe hanuana na heto.
9 Iehova Saboata ese kwabukwabuda basinema hamaurida, ita na Sodoma heḡereḡerena ai baitama noho, bona Gomora heḡereḡerena ai baitama hahelao.
10 Sodoma lohiamui e, Iehova ena hereva a kamonai! Gomora taumui e, eda Dirava ena hahediba herevadia a hakala heni!
11 Iehova na e tomu: Emui boubou ḡaudia momo egu ai be dahaka? Mamoe mamaruanedia e haḡoledia oho ḡaudia, bona ubu-ubu ḡaudia digaradia, vada na abi davana. Boromakau mamaruanedia eiava mamoe natudia eiava nani mamaru-anedia raradia asina moalelaimu.
12 Vairagu ai o hedinaraimu negadia ai, daika ese e hamaoromui egu ikou tanodia ba moimoilai?
13 Herahia ḡaudia asi anidia haida ma basio mailaidia; muramura mai bonana na ḡau dika-rohorohona egu ai. Hua matamatadia bona dina helaḡadia bona hebou boiboidia, kara havara bona hebou helaḡadia, na egu ai seme heḡereḡere.
14 Emui hua matamatadia bona emui aria negadia na lau laumagu ese e inai henidiamu; idia na maduna metauna egu ai, ihuadia ai na hesikumu.
15 Imamui ba toi roro negana ai, lau vairagu baina hunia emui ai; ena e ḡuriḡuri momo ba gwaurai, to lau basina kamonai; imamui na rara ai e honumu.
16 Sibomui ba hehuri; sibomui ba haheḡoeva; emui kerere na vairagu amo bavabi oho. Kara dika ba hadoko,
17 kara namo ikarana dalana ba tahua; hahemaoro ḡoevaḡoeva ba tahua; hahehisi karadia ba lao ahu; ihareha ba gimaia, vabu dainai ba hereva.
18 Iehova na e tomu: Aoma, aita hereva hebou. Ena be emui dika na paira na heto, to bae huroka-kuroka snow heḡereḡerena; ena be idia na kakakaka herea, to mamoe huina heḡerḡerena ai baela.
19 Lalomui bema manada bona boma kamonai, umui ese tano anina namona boma ania;
20 a boma gwau edeede bona boma daḡedaḡe, dare ese bema alamui mamase; badina be Iehova uduna vada e hereva.
21 Kara momokani hanuana, hahemaoro ḡoevaḡoeva ai e honuva hanuana, na ariara hahinena heḡereḡerena ai vada ela. Kara maoromaoro na ia lalonai e nohova, a harihari roroma taudia ese e noholaiamu.
