21 Kara momokani hanuana, hahemaoro ḡoevaḡoeva ai e honuva hanuana, na ariara hahinena heḡereḡerena ai vada ela. Kara maoromaoro na ia lalonai e nohova, a harihari roroma taudia ese e noholaiamu.
22 Emu silver na ḡau mirona ai vada ela, emui vine ranuna na ranu ida vada e hebulo.
23 Emui lohia na daḡedaḡe taudia, bona henao taudia ibamodia; iboudiai na koikoi henitaona e ura heniamu, bona herahia ḡaudia e ḡavadiamu. Idia ese ihareha se gimaiamu, bona vabu ena heatu-kau dalana se haeroamu.
24 Taunabunai Ḡaubada, Iehova Sabaota, Israel ena Goada Diravana, eto: A! Egu badu na inaigu latadiai baina seia kau, bona e inai henigumu taudia baina hadava henidia.
25 Imagu na baina toi roro henimui, emui miro na muramura amo baina havevea oho, e bulolaimui ḡauna dikana idoinai baina abia oho.
26 Emui hahemaoro taudia baina haginidia lou, gunaguna heḡereḡerena, bona emui haealo taudia danu, nega gunadia ai na heheto. Gaeamo bae gwauraimui kara maoromaoro hanuana, bona kara momokani hanuana.
27 Siona na hahemaoro ḡoevaḡoeva ese baine hamauria, bona ia lalonai vada e helalo kerehai taudia na kara maoromaoro ese baine hamauridia.
28 A daḡedaḡe taudia bona kara dika taudia na bae habuadia tari hebou, bona Iehova e rakataniamu taudia na bae aradia ore.
29 Badina be oak audia, o moalelaiva ḡaudia, daidiai ba hemarai, bona uma-uma, vada o abi hidi ḡaudia, daidiai vairamui bae kakakaka.
30 Badina be umui na oak auna, rauna e maraimu ḡauna, bona uma-uma asi pariparina, heḡereḡeredia ai ba hahelao.
31 Goada tauna na varo haura-haurana ai bainela, bona ena ḡaukara na lahi kimoremorena ai bainela; ruaosi bae ara bou, bona tau ta ese basine habododia.
