2 impo ikantaigapaakeri: —¿Ario ipokake Isure Tasorintsi itimasurentaigakempira vikyaenkara kematsaigankitsi? Ikantaigiri: —Tera nonkemakotumaigeri intimera Isure Tasorintsi.
3 Ikantaigiri Pavoro: —Iroroventi ¿tatampatyo oitara pogiviatashiigakara? Iriroegi ikantaigi: —Onti nogiviatashiigaka kameti nontsatagaigakerora yogotagantanakerira Joan Giviatantatsirira.
4 Impo ikanti Pavoro: —Antari yogiviatantakera Joan inti yogiviaigake kogaigankitsirira irapakuaiganakerora yovetsikageigira terira onkametite inkematsatasanoiganakerira Tasorintsi, kantankicha ikantaigavakeri aikiro inkematsaigakerira impogitapaankitsinerira, irirotari Jesokirishito.
5 Impo ikemaigakera ikantaigakerira ovashi yogiviatagantaigaka iokotagantaiganakara arisano ikematsaigakeri Atinkami Jeso.
6 Impo yogari Pavoro ipatikaiigakeri igitoku ovashi ipokapaake Isure Tasorintsi itimasurentaigapaakerira itsititantaiganakarorira iniantaiganakarora pashinipage niagantsipage terira inkemumaigero.
