20 Bema Lohiabada umui rakatania bona dirava idaudia edia hesiai gaukara umui karaia neganai, ia ese iena hanamoa kara umui dekenai do ia hadokoa, bona ia ese umui do ia hadikaia, bona umui do ia alaia ore.”
21 Vadaeni Israela taudia ese Iosua dekenai idia haere, idia gwau, “Lasi momokani, ai be Lohiabada ena hesiai gaukara do ai karaia.”
22 Vadaeni Iosua ese idia ia hamaoroa, ia gwau, “Umui sibona emui hereva dekenai umui hedinaraia, umui gwauhamata vadaeni, Lohiabada sibona do umui tomadiho henia.” Idia gwau, “Oibe, momokani, ai gwauraia hedinarai vadaeni.”
23 Iosua ma ia hereva lou, ia gwau, “Vadaeni, dirava idaudia, umui emui huanai idia noho gaudia do umui negea. Bona umui emui lalona do umui giroa Lohiabada, Israela ena Dirava dekenai.”
24 Israela taudia ese Iosua dekenai idia haere, idia gwau, “Lohiabada, iseda Dirava, ena hesiai gaukara do ai karaia, bona iena gadona do ai kamonai.”
25 Vadaeni Iosua ese unai dina dekenai Israela taudia danu gwauhamata taravatuna ia karaia. Unai gabu, Sekema dekenai, taravatu bona oda idauidau Iosua ia henidia.
26 Iosua ese unai hereva be Dirava ena Taravatu Bukana lalonai ia torea. Bona nadi badana ta ia abia, ouki auna henunai ia haginia, Lohiabada ena helaga gabuna dekenai.
27 Vadaeni Iosua ese Israela taudia ibounai ia hamaoroa, ia gwau, “Inai nadi be iseda uitnesi do ia lao. Inai nadi ese Lohiabada ese ita dekenai ia henia hereva ibounai ia kamonai vadaeni. Unai dainai inai nadi be iseda gwauhamata ena maka, vadaeni umui itaia negadia ibounai, be emui gwauhamata do umui laloa, emui Dirava do umui koia garina.”
28 Vadaeni Iosua ese Israela taudia ia siaia lao, idia ta ta edia tano, edia tano dekenai idia lao.
29 Unai murinai, Iosua Nunu, Lohiabada ena hesiai tauna ia mase. Iena mauri lagani ibounai be 110.
