26 Kate udueyei! Tauna avaha tomotau niwania mimini ka vonavona wayahia, ka eha aitam koiaka movina ta‑vito‑pote. Medeina? Yaka tau eta‑naonao avaha iawaehei vivane tauna Tau Ito‑yavuha?
27 Eha ana pata. Iuna onoto taina ya meagai avaha kanamanei. Kate avi tuta Tau Ito‑yavuha‑nana na‑omo, eha aitam koiaka ya meagai nꞌ‑anamane.”
28 Ka Iesu ya viwavenena Manua Vito‑pota a pai vi‑wauna nihenina eha ta‑iakwa, ka movina ananina wayahina ivona, “Ika, itomi avaha uanamaneu. Ka kadu avi papani wayahina aomo avaha uanamane‑yehai. Yauke aomo papani taina wayahina, kate eha taua yau nuanua ana heta adewei deina. Au tau vi‑tune‑nana, tauna yana dewa ahiahina kadu tunutunuhina akanai. Kate itomi eha utꞌ‑anamane koiaka tauna.
29 Ka yauke anamanei, iuna tauna vi‑tuneu, ka kadu ani‑tawanei avinꞌ‑omo baina tanopia.”
30 Ka vonana wayahina tomotau tupwai yoko‑nana nihenina idewa‑dadani ipoyꞌ‑avini. Ka eha aitam koiaka wayahia ta‑vo‑dadani. Iuna tauna eha yana tuta ta‑vaniahe yanꞌ aniga wayahina.
31 Ka tomotau habuhabui yoko‑nana nihenina ivitumahanei ka ivona, “Vona ahiahina, onoto taina dewa‑bagibagi habuhabui avaha dedewei. Avi tuta Tau Ito‑yavuha‑nana na‑omo, kadi ana pata tauna ya dewa‑bagibagi onoto taina ya dewa‑bagibagi nata‑tawane?”
32 Ka tomotau ivi‑awa‑yaya Iesu wayahina deina. Ka avaha Parisi dewaia inononi, e taui kadue tau vi‑nomu mata‑genai taui yai tau nau‑havia ivi‑tunei, e Iesu iyohoni. Wayahina, tau nau‑havia‑naia iomo, e yana vona inononi.
33 Ka Iesu ivona, “Tuta kutakutana ana heta nui kamamaei. Apaina amavina tauna au tau vi‑tune‑nana wayahina.
34 Ka apaina uneneneu, kate eha uvaniahau. Ka auyewana wayahina papani tunina wayahina amamaei, ka itomi eha ami pata papani‑nana wayahina unꞌ‑omo.”
35 Wayahina, me Iudea‑naia matataui ivi‑vonavona, ivona, “Aveta wayahina tauna na‑ne vivane apaina eha kavaniahe? Kaiwadi, tauna na‑ne me Iudea‑naia, taui nonova yai meagai ini‑tawanei ine mani papani, e me Girisi nui imamaei? Kadi tenoke tauna me Girisi viwavenei, a?
36 Ya vonana aviani anꞌ anamana? Iuna ivona, ‘Apaina uneneneu, kate eha uvaniahau,’ ka kadu ivona, ‘Papani tunina wayahina amamaei, ka itomi eha ami pata papani‑nana wayahina unꞌ‑omo.’”
37 Ka toneina anꞌ auyewa ananina auyewa pai nau‑yehata. Ka auyewana wayahina Iesu yoko niwania mini, ka movina ananina vi‑hone, ivona, “Aituhu aviyaivia wayahimia magami ayayana, akanai unꞌ‑omo wayahiua, e una‑nim.
38 Ka Iginuma ivona deina, ‘Yawai a daudau au tau vitumahana nuana wayahina nꞌ‑am‑iwaiwahi.’”
39 Ka Iesu tauna ya vonana wayahina ipuipupu Yaubada Nuana Ahihinata wayahina. Ka aituhu aviyaivia Iesu ivitumahanei, apaina Nuana Ahihinata na‑nu nihenia, mamaei. Ka auyewa tanoi wayahina, Nuana Ahihinata eha ta‑nuinu tomotau nihenia, iuna Iesu eha wahuma ta‑vane, kadu tauna eha didigana ta‑vaniahe. Apaina.
40 Ka tomotau habuhabui Iesu ya vonana inononi, ka tupwai ivona, “Vona ahiahina, onoto taina vivane Tau Apa‑taputapu‑nana.”
41 Ka tupwai kadue ivona, “Tauna vivane Tau Ito‑yavuha‑nana.” Kate tupwai eha yai nuanua, ka ivona, “Vona ahiahina, Tau Ito‑yavuha‑nana ya tupua eha Galili wayahina!
42 Medeina Iginuma voneka? Ivona vivane Tau Ito‑yavuha‑nana Davida yana dede wayahina omomo, kadu Davida ya meagai Betelehem nihenina na‑tupua. Ka Betelehem eha papani Galili nihenina! Wayahina, eha ana pata tauna vivane Tau Ito‑yavuha‑nana.”
43 Wayahina, tana‑vewana vinꞌ‑omo tomotau‑naia niwania deina.
44 Ka tupwai yai nuanua Iesu ipoyꞌ‑avini, kate eha aitam koiaka ta‑vo‑dadani.
