Ioanes 8:32-43 in Bola

³² Lakea bara mu lohoka vona a ngava muholi. Muri a ngava muholi bara i rata mua, mu matuka­paga.”

³³ Ri koli ri ta maea, “Mia e huriki a hamone Abraham. Pali paru hosi i valai mona, i uka ma mia a vorakato na viri tara. Pali i navai a hini o taki mavonga mia, ta mi gi matukapaga?”

³⁴ E Isu i koli, i ta maea, “A taki muholi mua, a viri i rata a naro hale ia a vora­kato na naro hale, i made polotano na tuhakanga na rabu hale.

³⁵ A vorakato, i uka murina na kabu na matakari vona. Pali a tuna bakovi i tahoka a murina na kabu vona. A murina i tabuli vakaroro.

³⁶ I mavonga kunana, a Tuna Bakovi ge rata mua mu matukapaga, bara mu matukapaga muholi.

³⁷ A lohoka vona ngi, mua a hamone Abraham. Pali ngane mu ngaru ni rabalaki iau, a vuhuna a nitagu i uka ma i dili na hatene mua.

³⁸ A taki mua vona a maka maki e Tata i vakasiri iau vona, pali mua ranga mu rata a maka maki mu longo ne tamane mua.”

³⁹ Ri koli ri ta maea, “E Abraham e tamane mia.” Lakea e Isu i taki ria, i ta maea, “E Abraham ge tamane mua, bara mu rata a maki e Abraham i rata.

⁴⁰ A taki mua vona a ngava muholi a longo na Vure, pali ngane mu ngaru ni rabalaki iau. A vilo mavonga i uka ma a vilone Abraham.

⁴¹ A vilo mavonga a vilone tamane mua.” E huriki a Pariseo i madihi a hatene ria ri ta maea, “I uka ma mia a tuna ngoi. E Tamane mia kunana a Vure.”

⁴² Lakea e Isu i taki ria, “A Vure i uka ma e Tamane mua. Ge ia e Tamane mua, bara mu ngaru iau, a vuhuna iau a valai na Vure, a bele koea. Iau i uka ma valai na ningaru nau. A Vure i rudu iau a valai.

⁴³ I navai i uka ma mu longokilala a hini a taki? I uka ma mu longokilala, a vuhuna mu koi ni longo a ngavagu.