36 Ava go ra tinata i tar tatike ba: Avat a tikan boko upi iau, ma pa avat a tikan tadav iau; ma nam ra gunan ina ki tana, pa avat a vana tana?
37 Ta ra mutuai ra bung na lukara, nina ra ngala na bung ta ra lukara, Iesu i tur, ma i oraoro dari: Ba tikai i mar, boina ba na tadav iau ma na momo.
38 Nina i nurnur tagu, da ra Buk Tabu i biti: A umana tava alir a launa, diat a lalalongo kan ra balana.
39 I tatike go ra tinata ure ra Tulungen, ba da tul tar ia ta diat dia nurnur tana; tago pa di ga tul tar boko ra Tulungen; tago Iesu pa i vana boko ta kana minamar.
40 Ta umana ta ra kor na tarai, ba dia valongore go ra tinata, dia biti: A dovotina go ia ra propet.
41 Ta ra umana bula dia biti: Dave ra Kristo na vut marama Galilaia?
42 A Buk Tabu pa i biti laka ba ra Kristo na vana rikai ta ra vuna tarai kai David, ma maro Beteleem, ra gunan ba David i ga ki tana?
43 Ma ra nuknuk i ra tarai i enana varbaiai ure.
44 Ma ta ra umana dia mainge ba diat a kinim ia; ma pa ta i vatut ia.
45 A umana luluai na vinarubu dia talil tadav ra umana tena tinabar ngalangala ma ra umana Parisaio, ma dia biti ta diat: Dave pa ava kinim pa ia Uti?
46 Ma ra umana luluai na vinarubu dia biti: Pa ta tutana boko i ga tatata da go.
47 A umana Parisaio dia tir diat: Ma di ga varara avat bula?
48 Dave ta ra umana tena varkurai, ba ta ra umana Parisaio vang dia tar nurnur tana?
49 Go ka ra kor na tarai pa dia nunure ra tinata na varkurai, a umana kaina ta.
50 Nikodemo (tikai ta diat, nina amana i ga vana pirana) i biti ta diat:
