6 Idia na unu e hereva toma na ia e dibaḡania, hahebade badina ta e tahua. A Iesu na e igo diho, imana kwakikwakina amo e toretore tano ai.
7 Idia ese e nanadaia loulou ela bona e tore isi, e hamaorodia, eto, Umui daika asi ena kara dika, ia ese nadi ta aine abia, ina hahine baine hodoa guna.
8 Bena ma e igo diho, tano ai ma e toretore.
9 Idia ese ena hereva e kamonai ai, sibodia edia kara dika e helalolai, bena ta ta amo e raka lasi, vara guna amo e matamaia ela bona tau muritai. Bena Iesu sibona mo e noho, una hahine ida.
10 Iesu ma e tore isi, hahine na e nanadaia, eto, Hahine e, hari e habadelaimu taudia be edeseni ai? Ta se hadikamu a?
11 Hahine na eto, Lohiabada e, asi tauna. Bena Iesu eto, Lau ese danu asina hahemaoro henimumu. Aola; basio kara dika lou.
12 Bena Iesu ese e haroro henidia lou, eto, Lau na tanobada diarina. Murigu ai baine raka tauna na dibura lalonai basine loa, a mauri diarina do baine abia.
13 Farisea taudia ese e gwau henia, eto, Oi na sibomu o hegwauraimu; emu hegwaurai na dia momokani.
14 Iesu ese e haere henidia, eto, Ena be sibogu na hegwauraimu, to egu hegwaurai na momokani; badina be dibagu ede amo nama, bona ede bainala danu dibagu; a ede amo nama bona ede bainala umui na asi dibamui.
15 Umui na taunimanima edia hahemaoro dalana ai o hahemaoromu; lau ese ta asina hahemaoro heniamu.
16 A bama hahemaoro negana ai egu hahemaoro bema momokani; badina be lau na dia sibogu, a Tamagu, e siaigu tauna, ese e bamogumu.
17 Emui taravatu ai ini e torea toma: taunimanima rarua hereva tamona bae gwauraia hebou, una na vada momokani.
18 Benaini, lau na sibogu na hegwauraimu, bona Tamagu, e siaigu Diravana, ese e gwauraigumu.
19 Bena idia ese e nanadaia, eto, Tamamu be edeseni ai? Iesu ese e haere henidia, eto, Umui na asi dibamui lau, Tamagu danu asi dibamui; boma diba lau, Tamagu danu boma diba.
20 Unu hereva be Iesu ese moni ihabouna gabuna ai e gwaurai, Dubu Helaḡa lalonai e hahedibava negana ai. Bona tau ta ese se dabaia tao, badina be ena nega na do se kau.
21 Iesu ese ma e hereva henidia, eto, Lau na dauha bainala. Umui ese ba tahugu, to emui kara dika ai vada ba mase. Bainala gabuna umui na basiola diba.
22 Bena Iuda taudia e henanadai heheni, eto, Ina ia sibona baine heala a? Una dainai e tomu “Bainala gabuna umui na basiola diba”, eiava?
23 Ia ma eto, Umui na henu amo, lau na atai amo; umui na tanobada taumui, a lau be dia tanobada taugu.
24 Taunabunai na hamaoromui, nato “Emui kara dika ai vada ba mase”. Badina be umui na basio abiabiraigu, emui kara dika ai vada ba mase.
25 Bena idia ese e nanadaia, eto, Oi na daika? Iesu eto, Na hereva henimuimu anina be dahaka?
26 Herevamui diaḡau do baina gwaurai, bona baina hahemaoro henimui danu. Ḡau tamona, e siaigu Diravana na momokani, bona iena amo na abi herevadia na tanobada na hamaorolaiamu.
27 Idia na lalodia asie parara ia ese Tamana e herevalaia.
