Text copied!
Bibles in Motu

IOANE 8:27-44 in Motu

Help us?

IOANE 8:27-44 in Buk Baibel long tokples Motu

27 Idia na lalodia asie parara ia ese Tamana e herevalaia.
28 Bena Iesu ma eto, Umui ese Taunimanima Natuna ba piua isi negana ai vada ba diba, lau na Ia. Kara ta danu sibogu asina karaiamu, a Tamagu ese e hadibagumu heḡereḡerena ai na herevamu.
29 E siaigu Diravana ese e bamogumu, ia ese se rakatanigu, sibogu asina nohomu; badina be iena ura karadia nega idoidiai na karamu.
30 Ini hereva e gwaurai negana ai hutuma ese e abiabiraia.
31 Iuda taudia haida ese Iesu e abiabiraia. Ia ese idia e hamaorodia, eto, Umui ese egu hereva ba badinadia, bena egu hahediba korikori ai baola.
32 Hereva momokani danu ba diba; bona hereva momokani ese baine ruhamui nege.
33 Idia na e haere, eto, Ai na Abraham garana; ai na tau ta isiaina asia lao heni, lasi ona lasi vaitani. Dahaka dainai oi na o tomu “Ba heruha nege”?
34 Iesu ese e haere henidia, eto, Momokani vaitani na hamaoromuimu, kara dika taudia na dika ese e guidiamu, bena idia ese dika isiaina e lao henimu.
35 Hesiai tauna be ruma ai se noho hanaihanaimu; a ruma tauna natuna hari ruma ai e noho hanaihanaimu.
36 Taunabunai, Natuna ese baine ruhamui nege, umui na ba heruha nege momokani.
37 Lau mai dibagu umui na Abraham garana; ḡau tamona umui na o uramu bavalagu, badina be egu hereva asio abi daemu.
38 Lau ese Tamagu enai na itava ḡaudia na gwaulaimu; umui ese tamamui enai o kamonaiva ḡaudia o karamu.
39 Idia ese e haere henia, eto, Ai tamamai be Abraham. Iesu eto, Umui na Abraham natuna o tomu be Abraham ena kara boma kara.
40 A harihari o uramu bavalagu, hereva momokani Dirava enai na kamonaiva bona na gwaurai henimuimu taugu. Abraham na unu se kara toma.
41 Umui ese tamamui ena kara o karamu. Idia eto Ai na dia ariara natudia; ai Tamamai be tamona, Dirava bunai.
42 Iesu n a eto, Tamamui bema Dirava, umui ese lau boma lalokau henigu; badina be Dirava ena amo nama, iniseni ai na nohomu. Lau na sibogu asinama; ia ese e siaigu.
43 Edeheto na herevamu negadia ai na lalomui asie pararamu? Badina be egu hereva iabi:daedia na asi dibamui.
44 Umui na tamamui Diabolo ena amo oma, bona o uramu tamamui ena heḡahusi karadia ba kara. Ia na matamana amo ala-ala tauna, bona hereva momokani se badinaiamu; badina be ia lalona ai hereva momokani na lasi. Ia na hereva koikoidia e gwauraimu, ena kara korikorina bunai; badina be ia na koikoi tauna, bona koikoi idoidiai tamadia.
IOANE 8 in Buk Baibel long tokples Motu