2 Bena aru taudia hutuma ia murina amo ela, badina be gorere ihamaurilaidia karadia e kara loulouva toadia e itava daidiai.
3 Iesu na ororo ai eha dara dae, unuseni ai ena hahediba ida e helai diho.
4 Iuda taudia edia Lagau-hanai Ariana na vairadiai e hure.
5 Iesu na e roha isi, hutuma bada ia dekena e maiva e itadia; bena ia ese Filipo e hereva henia, eto, Ita be edeseni ai aniani ḡaudia baita ha hoi, idia iubulaidia?
6 (Unu e gwau toma, Filipo baine dibaia eto; badina be ia na mai dibana dahaka baine karaia.)
7 Filipo ese e haere henia, eto, Dollar ruahui ai aniani ḡaudia baita ha hoi, to basie davana, sisisisidia mo bae ani.
8 Ena hahediba ta, ladana Andrea, Simona Petro tadina, ese e hereva henia, eto,
9 Mero-mero ta iniseni ai, ia na mai ana bali gabugabudia ima bona gwarume-gwarume rua; to unu na ede bae hekara toma, taunimanima na hutuma herea.
10 Bena Iesu eto, Taunimanima ba haduadia, bae helai helai diho. Una gabu na rei gabuna. bena taunimanima iboudiai e helai helai diho. Tatau iboudiai na dahaima readia.
11 Bena Iesu ese hari aniani ḡaudia e abi, e hanamoa, bena e ege diho taudia e henidia hagau-hagau; gwarume-gwarume danu unu e henidia toma, edia ura heḡereḡeredia.
12 Bogadia e kunu, bena ia ese ena hahediba e haduadia, eto, Aniani bahudia na ba habou, sisina taina basine boio.
13 Taunabunai idia ese bahu vada e habou, bosea gwauta-rua e hahonu, unu bali gabugabudia imaosi taunimanima ese e ani paru oredia e rakalani bahudia bunu.
14 Taunimanima ese una toa ia ese e karaia vada e itaia, bena eto, Momokani, tanobada bainema perovetana binai.
15 A Iesu dibana idia na baema, bae dabaia tao, edia hanua pavapavana ai bae halaoa eto; una dainai ia na sibona ororo ai ma eha dara dae lou.
16 Adorahi ai, ena hahediba vada e hekei kone ai.
17 Bena vanaḡi auta ai e gui, gohu amo bae heau hanai, Kaperanaum baela eto. Hanua e boi, a Iesu na do sela dekedia.
18 Bena guba ta ese e lasidia tao dainai, gohu vada e hurehure.
19 Maila toi eiava hani e bara, bena idia ese Iesu e itaia, gohu kopina amo vanaḡi e raka heniava; bena e gari.
20 To Iesu eto, Ina na lau; asio gari.
21 Bena idia lalodia e namo, vanaḡi ai e udaia; bena maoromaoro e lao heniava gabunai eha kau.
22 Daba ai hutuma na gohu unukahana ai gigini, dibadia vanaḡi ta lasi, hari hahediba ese e laohaia ḡauna mo; bona dibadia Iesu na ena hahediba ida asie gui, a hahediba mo sibodia vada ela.
23 A vanaḡi haida na Tiberia amo e heau hanai, hari Lohiabada ese Dirava e hanamoa bona aniani e henidia gabuna badina amo e toa.
24 Taunabunai, aru taudia vada e diba Iesu ena hahediba ida na lasihidia, bena hari vanaḡi auhidaosi ai ma e gui, Kaperanaum ela, Iesu eha tahua.
25 Idia ese gohu kahana ai e davaria, bena e nanadaia, eto, Rabi e, edena nega ai oma?
26 Iesu ese e haere henidia; eto, Momokani vaitani na hamaoromuimu, umui ese lau o tahugumu, dia toa o ita dainai, to aniani ḡaudia o ani bogamui e kunu dainai.
27 Basio ḡaukara e oremu anianina iabina, a baine mia ela bona mauri hanaihanai anianina iabina ba ḡaukara. Una na Taunimanima Natuna ese baine henimui; badina be Tamana Dirava ese toa ta ienai vada e karaia.
28 Bena idia ese e nanadaia, eto, Ai ese ede baia kara toma, Dirava ena ḡaukara ikarana?
29 Iesu ese e haere henidia, eto, Dirava ena ḡaukara binai: e siaia tauna na ba kamonai henia.
30 Idia ese ma e nanadaia, eto, Toana be dahaka ba karaia, baia itaia, hena baia kamonai henimu? Oi dahaka bo karamu?
31 Ai senemai ese mana e aniava tano ḡaḡaena ai, buka ai e torea heḡereḡerena, eto, Adia aniani na ia ese guba amo e henidia dobiva.
32 Iesu ese e haere henidia, eto, Momokani vaitani na hamaoromuimu, dia Mose ese aniani na guba amo se henimui dobiva; a Tamagu ese aniani guba amo vada e henimui dobimu, aniani korikorina binai.
33 Badina be Dirava ena aniani na guba amo vada eme diho, bona mauri na tanobada e heniamu.
34 Bena idia ese e noia, eto, Lohiabada e, ina aniani na dina iboudiai ba henimai.
35 Iesu eto, Mauri anianina lau binai: dekegu bainema tauna na basine hitolo, bona baine abidadama henigu tauna na basine ranu mase, lasi ona lasi vaitani.
36 A na hamaoromui, ani, vada o itagumu to asio abigu daemu.
37 Tamagu ese e henigumu taudia iboudiai na dekegu baema; bona dekegu bainema tauna na basina lulua oho, lasi ona lasi vaitani.
38 Badina be guba amo vada name diho, dia lauegu ura ikarana, to e siaigu Diravana ena ura ikarana.
39 Bona e siaigu Diravana ena ura binai: ibouboudiai ia ese vada e henigu na ta basina reaia, a baina hatoredia isi dina gabena ai.
40 Badina be Tamagu ena ura binai: Natuna bae raraia tao bona bae abidadama henia taudia iboudiai ese mauri hanaihanai bae abia, bona lau ese dina gabena ai baina haloredia isi.
41 Bena Iuda taudia ese ia e maumauraia, badina be ia eto “Lau na guba amo eme diho anianina”.
42 Idia eto, Ina na dia Iesu Iosef a? Tamana sinana asi dibada a? Edeheto ia na e tomamu “Lau na guba amo vada name diho”?
43 Iesu ese e haere henidia, eto, Ene na asio maumau toma.
44 Tamagu, e siaigu Diravana, ese baine veria mai tauna mo sibona lau dekegu bainema diba; bena lau ese baina hatorea isi dina gabena ai.
45 Peroveta bukana ai ini e torea toma, eto, Idia iboudiai na Dirava ese baine hadibadia. Tamagu e kamonai heniamu bona ena hahediba herevadia e abi daemu taudia iboudiai lau dekegu e maimu.
46 To tau ta ese Tamada se itaia; Dirava ena amo vada ema launa sibona ese vada e itaia.
47 Momokani vaitani na hamaoromuimu, kamonai tauna ese mauri hanaihanai eme abia.
48 Mauri anianina lau binai.
49 Tamamui ese mana e aniava tano ḡaḡaena ai, to vada e mase.
50 Guba amo e dihomu anianina binai, ta ese baine ania, ia na basine mase.
