22 Umui Samaria taumui ese o toma henia dihomu Diravana na asi dibamui; ai be a toma henia dihomu Diravana na dibamai. Badina be hahemauri na Iuda taumai emai amo.
23 A nega ta be maimu, harihari vada be kaumu, toma-diho taudia korikori ese Tamada bae toma henia diho lauma ai bona momokani ai, badina be Tamada ese unu bae toma henia diho toma taudia na e tahudiamu.
24 Dirava na Lauma; bona bae toma henia diho taudia ese lauma ai bona momokani ai bae toma henia diho.
25 Hahine na eto, Lau na dibagu Mesia, Keriso e gwauraiamu, do bainema; bona bainema negana ai ia ese ḡau iboudiai baine gwaurai hedinarai.
26 Iesu ese e hamaoroa, eto, Tauna bina lau, vada na hereva henimumu.
27 Una negana ai ena hahediba vada e lou, ia dekenai e kau, bena e hoa, badina be ia na hahine ta ida e hereva-herevamu. A ta ese se nanadaia “Dahaka o tahuamu?” eiava “Dahaka dainai ia ida o hereva-herevamu?”
28 Bena una hahule ese ena hodu e rakatania, hanua ela. Ia ese hanua taudia e hamaorodia, eto,
29 Aoma, tau ta a itaia, egu kara iboudiai ia ese e hamaorolaigu. Dahaka o tomamu, ia na Keriso eiava?
30 Bena idia na hanua amo e aru lasi, ia dekena ela.
31 Una negana ai ena hahediba ese e hamaoroa, eto, Rabi e, avaniani.
32 A ia ese e hamaorodia, eto, Lau na mai agu, umui asi dibamui gauna.
33 Bena ena hahediba na sibodia e henanadai heheni, eto, Ta ese ana aniani vada e mailaia eiava?
34 A Iesu ese e hamaorodia, eto, Agu aniani binai: e siaigu Diravana ena ura baina karaia, iena ḡaukara baina haḡuḡurua.
35 Umui na mai emui hereva ta, ani, o tomamu “Hua hani baela bena uit iutuna negana baine gini dae”. A na hamaoromuimu, a gaga isi, uma ba ita, anidia vada e lo, iutuna negana heḡereḡerena.
36 lutuna tauna ese davana e abiamu, bena uma anina e habouamu, mauri hanaihanai ḡauna; taunabunai, ihadona tauna bona iutuna tauna bae moale hebou.
37 Badina be vaia e gwauraiamu herevana be momokani: ihadona tauna be idau, iutuna tauna danu idau.
38 Lau ese na siaimui, asio hekwarahilaia ḡauna na ba utua; haida be vada e hekwarahi, umui ese edia hekwarahi anina vada ome abia.
39 Samaria taudia hutuma una hanua lalonai ese Iesu e abiabiraia, una hahine ena hereva dainai: hahine na eto “Egu kara iboudiai ia ese e hamaorolaigu”.
40 Taunabunai, hari Samaria taudia na ia dekena ela, e noia, dekediai baine noho; bena dina rua unuseni ai e noho.
41 Bena ena hereva daidiai hutuma ese e abiabiraia.
42 Bena idia ese una hahine e hamaoroa, eto, Ai na dia harihari oiemu hereva dainai asia abiabiraiamu, a badina be ai sibomai vada ame kamonai bona ame diba ina na momokani tanobada ihamauruina tauna.
43 Unu dina rua e ore, bena ia na e tore isi, Galilea ela.
44 Iesu vada e hereva, eto, Peroveta tauna na ena hanua korikori taudia ese basie matauraia.
45 A Galilea ai e lasi negana ai na Galilea taudia ese e abia dae, Ierusalem ai aria negana ai e kara ḡaudia iboudiai matadia amo vada e ita dainai; badina be idia danu una aria ela.
46 Galilea hanuana ta, ladana Kana, ai e lasi: una na vanegai ranu vine ranuna ai e halaoa gabuna. Lohia ta Kaperanaum ai natuna vada e gorerea;
47 ia e kamonai Iesu na Iudea amo vada ema, Galilea ai vada e kau, bena Iesu dekena ela, e noia, bainela, natuna baine hamauria; badina be mero na e mase rea mase reava.
48 Iesu eto, Umui na toa bona hoa karadia basio ita, umui na basio kamonai.
49 Hari lohia eto, Lohiabada e, mani aitala, natugu vada be masemu.
50 Bena Iesu ese e hamaoroa, eto, Aola, natumu vada eha mauri. Una tau ese Iesu ena hereva e abia dae, vada ela.
51 Dala amo e laova ai, ena hesiai taudia vada ema, ia ida e hedavari; bena eto, Mero na vada eha mauri.
52 Bena ia ese e nanadaidia, edena hora ai tauna e dai namo. Tatau eto, Varani dina tubua kahana ai gorere siahuna e doko.
53 Bena tamana na e helalo une, ia ese Iesu e hereva henia horana bunai, bena Iesu ese e hamaoroa, eto “Natumu vada eha mauri”. Bena ia bona ena ruma taudia iboudiai ese vada e abidadama henia.
