14 Eai to eai goila wa eau ea mosei ie nom taba nige i gadomagu, goila wa ea mosei ia arinai, nuaboeana eai abo i hemala goila huana i bunubunuasima mauri nige nosina arinai.”
15 Sine wa i ribalau ia arinai i ene, “Taubada e, wau goila wa u leama, abo nige ea gadomagu, eo abo hinage nige ea laoma eda lohaloha eai goila ea ledu.”
16 Iesu ia i heriba i ene, “U lau monem u eogaiama, au laoma inai.”
17 Sine wa i ribalau ia arinai i ene, “Eau nige monegu.” Iesu i ribalau ia arinai i ene, “U riba dudurai u ene ‘Eau nige monegu.’
18 Monemyao haligigi u abidio; esau wa maem aue mia ia nige monem, wau em riba wa i dudurai.”
19 Sine wa i ribalau ia arinai i ene, “Taubada e, nuana oa peroveta.
20 Tubutubumaiyao ina oea tupina eai ta se tabaohu; omi au ene Ierusalema tatao edi aba tabaohu mamohoina ede.”
21 Iesu i ribalau ia arinai i ene, “Sine e, mamohoi, huiana abo i lagema omi ina oea tupina eai ta, Tamana abo nige au tabaohui, eo Ierusalema eai nige’e.
22 Emi tabaohu omi nige au nuatui: ai ema tabaohu ai nuatuiyao, abihemauri Iudea tataodi aridi eai i laoma.
23 Huiana abo i lagema, hinage i lagemao, tautabaohu tataodi tahunuadi earua eai eo nuatu mamohoina eai Tamana se tabaohui: doha ede nei Tamana tautabaohuina i eooidi.
24 Eaubada Earuana ede: isi ia se tabaohui abo se tabaohui earua eai eo nuatu mamohoina eai.”
25 Sine wa i ribalau ia arinai i ene, “Ea nuatui Mesia abo i lagema, esana ede Keriso: ia i laoma ginauri gamagaridi abo i heribamai.”
26 Iesu ia i heriba i ene, “Eau ede, maem ta ribariba.”
27 Isi ma ribaribadi na ena heaheatayao se lagetawaidi, sine ne maena se ribariba se ita se tagugu, ede nige esau i ene, “Saha u eooi?” eo “Ue saha u ribalau sine ne arinai?”
28 Sine wa ena ledu i laugabaei, ie lau eanua eai, i ribalau tatao aridi eai,
29 i ene, “Au laoma tau esau au ita, egu laulau gamagaridi ea laulauedi wa ia i hemasarahadi arigu eai: ia Keriso e nige’e?”
30 Isi eanua se laugabaei se oigogo se lau ia arinai.
31 Isi soradi, ena heaheata se ribaribadaoi, si ene, “Tanuagamai e, u aiai.”
32 Ia i ribalau isi aridi eai i ene, “Agu aiai nonohana, nige au nuatui.”
33 Arinai abo heaheata wa se heunaboisaha si ene, “Tau esau ana aiai i leama wa?”
34 Iesu i heribadi i ene, “Agu aiai ede ina, tauhetamariguma ena nuatu bena ea abi, eo ana paisoa ea ginauriheohi.
35 Omi nige au ene, nawalai hasi abo boreboreha huiana wa? Au ita ea heribamiu ta, Matamiu au tusaedi, oeadi ne au italaedi, masuri se pogalao.
36 Sitona tautomtomna se hemaisadi, aiai se peigogo mauri nige nosina arinai, lie tauumaina eo aiai tauabina isi abo taudi labui se kodelabulabui.
37 Arinai ede riba wa se ribaei riba mamohoina ede, ‘Esau i umauma, esau aiai i abiabi.’
38 Ea hetamarimiu aiaina bena au abi hari tatao adi paisoa wa se umaiyao, adi paisoa au helaudamai.”
39 Samaria tataodi gamagaridi nei eanua eai ne ia se ataiwatai sine wa ena riba eai, i ribahemasaraha wa, i ene, “Egu laulau gamagaridi ea laulauedi i ribahemasarahadi arigu eai.”
40 Samaria tataodi se lagema se ribagadogadora ia arinai bena i mia, arinai asubena labui aridi eai ie mia.
