9 Iuda taudia momo herea idia kamonai Iesu be unuseni, vadaeni unai gabu dekenai idia lao, Iesu sibona totona lasi, to Lasaro, Iesu ese mase dekena amo ia hatorea isi tauna, itaia totona.
10 Unai dainai dubu biagudia idia hereva hebou, Lasaro danu do idia alaia, idia gwau.
11 Badina be Lasaro totona Iuda taudia momo idia raka siri, Iesu dekenai idia abidadama henia.
12 Dabai, aria totona idia haboua Iuda taudia momo herea idia kamonai vadaeni Iesu be Ierusalema dekenai do ia daekau.
13 Vadaeni pama au rauraudia idia abia, Iesu ena vairana dekenai idia lao, idia boiboi, idia gwau, “Hosana! Lohiabada ena ladana dekenai ia mai tauna ita hanamoa! Ia be Israela ena King!”
14 Vadaeni Iesu ese doniki ena natuna ta ia davaria, bona iena doruna dekenai ia helai, Buka Helaga dekenai ia torea hegeregerena, ia gwau,
15 “Siona hanua ena natuna kekeni e, oi gari lasi. Oi itaia, oiemu King ia mai noho. Doniki ena natuna latanai ia helai noho.”
16 Iena diba tahua taudia be unai hereva ena anina idia diba lasi unai neganai, to Iesu ese iena hairaina ia abia murinai idia laloa vadaeni, idia gwau, “Inai bamona hereva be guna idia torea vadaeni Buka Helaga lalonai Iesu totona, bona idia vara momokani.”
17 Taunimanima momo be Iesu danu idia noho, ia ese Lasaro guria gabu dekena amo ia boiria murimuri dekenai, bona mase dekena amo ia hatorea isi neganai. Vadaeni idia ese iena sivarai idia gwauraia loaloa.
18 Unai dainai taunimanima momo be Iesu ena vairana dekenai idia lao, badina be idia kamonai vadaeni ia ese unai hoa kara ia karaia.
19 Vadaeni Farisea taudia idia sibona idia hereva henia, idia gwau, “Umui itaia, umui be umui lusi vadaeni, tanobada ibounai be iena murina dekenai idia raka vadaeni.”
20 Aria neganai tomadiho totona idia daekau taudia haida be Helene taudia.
21 Idia be Filipo, Betesaida Galilea tauna, dekenai idia lao, idia hamaoroa, idia gwau, “Tau badana e, ai ura be Iesu ai itaia.”
22 Filipo ia lao, Andrea ia hamaoroa, vadaeni Andrea be Filipo danu idia lao, Iesu idia hamaoroa.
23 Vadaeni Iesu ia haere idia dekenai, ia gwau, “Nega ia ginidae vadaeni, Taunimanima ena Natuna ese iena hairaina do ia abia.
24 Momokani, momokani umui lau hamaoroa, bema uiti ena uhena be tano dekenai do ia moru lasi, bema ia mase lasi, ia be sibona do ia noho kava. To bema ia mase, anina momo do ia atoa.
25 Iena mauri ia ura dogoatao tauna ese mauri do ia halusia, to iena mauri inai tanobada dekenai ia laloa lasi tauna be mauri do ia abia, ia lao bona hanaihanai.
26 Tau ta bema ia ura lauegu hesiai gaukara do ia karaia, ia ese lauegu murina dekenai do ia raka. Vadaeni do lau noho gabuna dekenai, egu hesiai tauna danu do ia noho. Bema tau ta ese lauegu hesiai gaukara do ia karaia, egu Tamana ese do ia hanamoa.”
27 “Harihari lauegu kudouna ia hisihisi. Dahaka do lau gwauraia? Do lau gwau, ‘Egu Tamana e, inai harihari nega dekena amo lau oi hamauria?’ Lasi, badina be hari inai nega totona lau mai ginidae vadaeni.
28 Egu Tamana e, oiemu ladana oi hanamoa!” Vadaeni gado ta guba dekena amo ia mai, ia gwau, “Lau hanamoa vadaeni, ma do lau hanamoa lou.”
29 Vadaeni taunimanima momo unuseni idia gini, be hereva idia kamonai, vadaeni idia gwau, “Guba ia boiboi.” Ma haida idia gwau, “Aneru ta ese ia hereva henia noho!”
30 Iesu ese ma ia hereva henia idia dekenai, ia gwau, “Unai gado be lau totona lasi, to umui totona ia mai.
31 Harihari inai tanobada taudia be Dirava ese ia kota henia, harihari ia ese inai tanobada ena lohia do ia lulua murimuri dekenai.
32 Tanobada dekenai lau do idia abia isi neganai, taunimanima ibounai be lau dekenai do lau veria.”
