34 Vadaeni taunimanima momo idia haere ia dekenai, idia gwau, “Ai be Dirava ena taravatu hereva dekena amo ai kamonai vadaeni, Keriso be do ia noho hanaihanai. Badina dahaka oi gwau Taunimanima ena Natuna be do idia abia isi? Inai Taunimanima ena Natuna be daika?”
35 Iesu ia gwau, “Nega sisina diari be do ia noho umui dekenai. Do umui raka namonamo, diari umui abia noho neganai, dibura ese umui do ia koua garina. Dibura lalonai ia raka tauna ia lao henia gabuna ia diba lasi.
36 Diari umui abia noho neganai, diari dekenai do umui abidadama henia, ia ese diari taudia umui do ia halaoa totona.” Iesu be unai bamona ia hereva, vadaeni ia raka siri, idia dekena amo sibona ia hunia.
37 Iesu ese hoa kara momo edia vairana dekenai ia karaia, to idia be idia abidadama henia lasi ia dekenai.
38 Unai dainai, Isaia, peroveta tauna, ena hereva ia momokani vadaeni, ia gwau, “Lohiabada e, daika ese aiemai hereva ia abia dae? Bona Lohiabada ena imana be daika dekenai ia hedinaraia?”
39 Unai dainai idia ese idia abidadama henia lasi, badina be Isaia ma ia gwau,
40 “Dirava ese edia matana ia hakepulua vadaeni. Edia lalona danu ia hadiburaia. Edia matana dekena amo do idia itaia garina, bona edia lalona dekena amo do idia diba garina, vadaeni edia lalona do idia giroa, bona Dirava ese idia do ia hamauria garina.”
41 Isaia be unai bamona Iesu ia herevalaia, badina be ia ese Keriso ena hairaina ia itaia guna vadaeni.
42 Unai neganai hanua lohia taudia momo ese idia abidadama henia Iesu, to idia gwauraia hedinarai lasi, Farisea taudia dekenai idia gari dainai, dubu dekena amo do idia luludia garina.
43 Badina be taunimanima edia hanamoa dekenai idia ura henia bada, Dirava ena hanamoa dekenai idia ura henia maragi.
44 Iesu ia boiboi, ia gwau, “Lau dekenai ia abidadama henia tauna ese lau sibona lasi, to lau ia siaia Diravana danu ia abidadama henia.
45 Bona lau ia itaia tauna ese lau ia siaia Diravana danu ia itaia.
46 Lau be tanobada dekenai lau mai vadaeni, diari bamona. Unai dainai lau idia abidadama henia taudia ibounai be dibura lalonai do idia noho lasi.
