11 Beli, Yesus em Selusalem abiw mutuk fian kawtem elo uneko, Galili aneng fian tele, Samalia aneng fian tele, aneng alew beem mutuk ka kakamele ding dim bakate,
12 abiw fong gel mak kawtem unse kale. Beem ding dim bakate, king kel bulul abung fian so kunum mak singam miyak ka kel keko,
13 weng fian kuw gaanomeliw: “Kukuyemin kunum Yesus kutaka! Ku nulo kinkin keyema o!”, dangeko gaansiliw kale.
14 Gaanemiwi, Yesus em ilo yetemse ding dim bakate, e ilo bokoyemomele: “Yu uneko, yukalem kal e Sunbin-Got em am yol em kunum ayem sel em afak kebiliw kunum ilo kukuyem unoliwka!”, yangse kale. Yangei, i uneko, deiwkim kel unsiliw ding dim bakate, i atemiwete: Ikalem kal e ken ati kuw keyemei, i atemsiliw kale.
15 Alik alik i fein atemsiliw kate, makmak kunum ete kuw famdes angeko, weng fian kuw gaaneko, Sunbin-Got em wiin fian daolewsomi,
16 Yesus em mit mewso katin bukbuk gatak wakas teineko, elo “Weso! Seyo!”, dangse kale. Kate, kunum be Isalael kawtiw im maka keko, Samalia aneng fian em kayak kese kale.
17 Beli, Yesus e elo dakalalomele: “King kel kunum bulul abung fian so kunum kilelyemsi sako? Kate, mali teiw kel kunum bi nal kel biliw a?
18 Nimtew angom ete Isalael kawtiw num ibik biliw kawtiw biim kunum makmak bete kuw tele kate, mali kunum bikati famdeko, Sunbin-Got em wiin fian daolinba keliw a?”, dangse kale.
19 Dangeko, kunum beelo bokolewomele: “Ku moko, una! Ku nelo ‘Fein!’, nangew kasike, kom ibolow mutuk tem so akati ken kekemi te.”, dangse kale.
20 Deiw mak ding mak mali Falisi kunum mak Yesus elo dakalalomeliw: “Sunbin-Got em gawman ding dim e nal em tit toloke ya?”, dangeko, dakalasiliw kale. Dakalaliwi, Yesus e yan weng mak bokoyemomele: “Kawtiw i Sunbin-Got em gawman ding dim be kiin so atemeko,
21 ‘Tele baka kai! Tele baka kai!’ angeko, nam atemiw te. Nimtew angom? Sunbin-Got em gawman ding dim be kame kuw yukalem mutuk ka kel kaim dim kuw fitewse kasike.”, dangse kale.
22 Dangeko, akalem gelewkabiliw kunum biilo bokoyemomele: “Deiw mak ding mak kabalak e, yu ibolow dining danong kesomi, ‘Nu Kawtiw Aul beem ding mak atemomin ibolow fian kebuluw kai!’, angokoliw kate, yu ding mak nam atemokoliw te.
23 Beem ding dim bakate, mali kawtiw mak yulo bokoyemomeliw: ‘Kawtiw Aul e baka kai! Bakale te!’, yangokoliw kate, yu kanelom im yange weng be kiliko, geleweko, kalo unokoliw te! Bate!
24 Nimtew angom? Kawtiw Aul nem toloki ding dim bakate, bamneng ailbin em falak emdiw angoke kasike, aneng aneng angom biim kasel alik alik i nelo makuw netemokoliw kasike.
25 Mesesem mesesem eisneng be ibik ete kaneloke kate kameem ding dim bakate, kawin dim kaleem kasel i Kawtiw Aul nelo ilum betbet fian mak dunemeko, nelo ibik kunemokoliw te.
