IKUƆ́ NÌÙBƐ̀ 27:18-33 in Ditammari

¹⁸ Kɛ̀ tidɑɑtì fĩ́ĩmmù benni mɛ mpɛ̃ɛ̃tɛ́, kòò kɛ̀ nni mpɑ̃, ikuɔ́ nìùtìi kɑɑ̀ nyɛbie nyɛ̀ɛ̀ kpɑɑ́ kɛ̀ tidɑɑtì fĩ́ĩmmù benni tɛrìi tuɔkɛní kɛ́kéétɛ́ kɛ díítí.

¹⁹ Kɛ̀ kɛ̀ yiɛ̀ nwɛ̃̀tɛ kɛ dɔ́ kɛ́ kɛ̀ dontɛ́ wèe yietí ikuɔ́ nìùtì kèétɛ́ ìì díítí kɛ́nɔ́ɔ́ nkɛ ì mmɑ̀nnɛ̀ bɛ̀ bo totɛ́mɛ̀ ò yietí ì yɛcúò yɛ̀nùmmù kó dìmɑ́ɑ̀ kɛ́ kɛ̀ tiekɛ.

²⁰ Kòo mɛ nyí kɛ̀ dontɛ́ o mɔ́mmuɔ nkòò kɛ̀ fìtɛ́nɛ̀ otɔù mɔù dɛ̀ dèèmu. Ò tɛ̃́nkɛ bɑ́ɑ́ nɑ kɛ́ kɛ̀ dontɛ́.

²¹ Kɛ̀ tidɑɑtì fĩ́ĩmmù benni mɛ ntùɔ̀kɛ, wèè mɛ nkɛ̀ dontɛ́ wèe kɛ̀ yóu, kɛ̀ nɑɑ́ n kɔkɛ nkɛ. Ikuɔ́ nìùbɛ̀ bɛɛ̀ kɛ̀ tiekɛ. Bɛ̀ kɛ̀ nni mpɑ̃mu.

²² Kòò mɔù m pɑ̃ kɛtenkɛ̀ ò dontɛ́ kɛ̀, kɛ̀ dɛ̀ í tú o yɛmbɛ̀ kɔkɛ,

²³ ikuɔ́ nìùtìi wéntɛ́ yɛbie nyɛ̀ɛ̀ kpɑɑ́ kɛ̀ tidɑɑtì fĩ́ĩmmù bennii tuɔkɛní kɛ́kéétɛ́ kɛ díítí wèè kɛ̀ nni mpɑ̃ɑ̃ nkòo yietí kɛ díítí dɛ yiè, ì tu n kpɛyi nyi.

²⁴ Kɛ̀ tidɑɑtì fĩ́ĩmmù benni tùɔ̀kɛ wèè do kɛ̀ te nɛ̀ dimɔ̀nnì wèe wɛ̃tɛ kɛ́ kɛ̀ cɔutɛ́, o yɛmbɛ̀ kɔkɛ nkɛ.

²⁵ Bɛ̀ níí yóó tũnnɛ idìítí ìì kèétɛ́ mɛtɑummɛ̀ tou kpɛ́í i kó kukperíkù nku, kɛ́kéétɛ́ dɛ kó idíítí. Dɛ kó idíítí kó fɛsɑ́m̀pɔ́fɛ̀ cɛ̃́ɛ̃́kù bo kɑ̀dɑ́mmù tɛpíítɛ̀ ntɛ.

²⁶ Òmɔù bɑ́ m pɑ̃ o ɔ̃̀fɛ̀ pɛitɛ́ fɛ̀ mɛketimɛ̀ kɛ̀ fɛ̀ tu fɛdɑɑfɛ̀, fɛ̀ diɛ nkɛ tú n kɔfɛ nfɛ. Kòo nɑ̀ɑ̀fɛ̀ nfɛ yoo o pìèfɛ̀ yoo o buɔtɛ̀.

²⁷ Kòò mɔù m pɑ̃ fɛɔ̃̀fɛ̀ bɛ̀ í n feu fɛ̀, bɛ̀ bo nɑ kɛ́wɛ̃tɛ kɛ́ fɛ̀ dontɛ́ kɛ́yietí fɛ díítí kɛ́nɔ́ɔ́ nkɛ̀ dɛ̀ mmɑ̀nnɛ̀ bɛ̀ bo totɛ́mɛ̀ o yietí ì yɛcúò yɛ̀nùmmù kó dìmɑ́ɑ̀. Kɛ̀ fɛ yiɛ̀ mɛ nyí dɔ́ kɛ́wɛ̃tɛ kɛ́ fɛ̀ dontɛ́ bɛ̀ɛ fɛ̀ fìtɛ́ fɛ díítí.

²⁸ Kòò mɔù m pɑ̃ dɛ̀mɑrɛ̀ kɛ tú, ò dɛ̀ nni mpɑ̃mu sɑ̃́ɑ̃̀, bɛ̀ bɑ́ɑ́ nɑ kɛ́wɛ̃tɛ kɛ́ dɛ̀ dontɛ́ yoo bɛ̀ɛ dɛ̀ fìtɛ́. Kòo nìtì nwe yoo fɛɔ̃̀fɛ̀ yoo o yɛmbɛ̀ o yóunɛ̀ kɛ̀ɛ̀ tenkɛ̀, bɛ̀ m pɑ̃ɑ̃ ndɛ̀ɛ̀ kó dimɑ̀ɑ̀ mɛbotí dɛ̀ tu n kpɛrɛ ndɛ.

²⁹ Kòo nìtì nwe bɛ̀ m pɑ̃mɛ̀ bɛ̀ bɑ́ɑ́ nɑ kɛ́wɛ̃tɛ kóò dontɛ́, bɛ̀ɛ ò kùɔ.

³⁰ Kɛ̀ di dɛ̀itɛ di pɑɑ nkó tidiitì nɛ̀ di tebiiti dí dɛ̀ berí kɛ́dɛitɛ dɛ̀ɛ̀ tu dɛpííndɛ̀, dɛ̀ tu n kpɛrɛ ndɛ.

³¹ Kòò mɔù dɔ́ kɛ́wɛ̃tɛ kɛ́dontɛ́ o kó dɛpííndɛ̀ kó dɛ̀mɑrɛ̀ wèe yietí kɛ́nɔ́ɔ́ nkɛ̀ dɛ̀ mmɑ̀nnɛ̀ bɛ̀ bo totɛ́mɛ̀ ò yietí ì yɛcúò yɛ̀nùmmù kó dìmɑ́ɑ̀.

³² Dɛ̀ɛ̀ kó dimɑ̀ɑ̀ tu iwũɔ̃, inɑ̀ɑ̀kɛ nɛ̀ ipe nɛ̀ sibɔɔ́, fɛ̀ɛ̀ ɔ̃̀fɛ̀ níí tú fɛpíínfɛ̀ fɛ̀ tu nkɔfɛ nfɛ.

³³ Dí níí bɑ́ɑ́ fɛ̀ cèètɛnɛ̀ fɛsɑ̀ɑ̀fɛ̀ yoo fɛsĩ̀nfɛ̀. Kòò mɔù fɛ̀ cèètɛ, fɛnfɛ nɛ̀ ò cèètɛnɛ̀ fɛ̀ idɛ́ ì nɑɑ́ n kpɛyi nyi, bɛ̀ mɛ mbɑ́ɑ́ nɑ kɛ́wɛ̃tɛ kɛ́ ì dontɛ́.