1 Ekaa kempuka vatai Variqava, Noravano Kotiva uva tiro. Ekaa naato vatanaaka kuari avu urinaihainaakave, kuari avu ruhunku vinaihainaakave, vika vika naare vairave.
2 Saioni vatuka voqaraa vatukavano vaivaro viraqaahairo Kotiva ataama nimite vairo.
3 Mpo, ti Variqavano tuvi vaivo. Viva kia evaara tuviraitiro, viva tuvi vaivaro voqama kero tatoqake vai ihava vira avuni otu vi vaivaro, aaronaa noravano vira ututuma tero vairo.
4 Viva tuviharo naveraitiharo, Naaruvavanovata vatavanovata tave vaiqe te tenta vaiinti nahenti uva avuqavu qiare.
5 Te tenta ˻Isareri˼ vaiinti nahenti hampata uva tiva taatau taunara kempukaiqama vuarire ti, quara aantau ti iha quara timitaaka, ne ani ruvaaqumavi vaiqe uva tiare, tiro.
6 Kotiva minti tivaro naaruvavano tiharo, Kotiva naima ko avuqavu ti vaivara tiro, viva avuqavuqama keharo uva avuqavu i vairave, tiro.
7 Minti tivaro Kotiva tiharo, Ho ti vaiinti nahentivauvo, te uva tiari iriate. Ne Isareri vatanaakao, te Kotika ni Variqavano vaurauka niqaa uva vatarerave.
8 Ne quara aantau arukeha iha quara timite varia ofaarave, ne ekaara iha quara timite varia ofaarave, te kia vira kaara niqaa uva vataraiti, te vo haika kaara niqaa uva vatarerave.˼
9 Ne nenta avutaqihai purumakauve memeraave vare qumina ti timivorave.
10 Ne kiae iriavo? Ekaa aantauvahi nantaqi variaka te uraukaqaima variavo. Ekaa vo aiqina vo aiqinaqaa varia purumakauka, te uraukaqaima variavo.
11 Aiqina vainaini vai uvirirave, ekaa aantauvahi toveqive, ekaa vi haikara vi haikara te uraukaqaima variavo.
12 Ti hantuqa haritirio, te kiama ni karara naariraiti, ˻te tentama kara varake nauraitirio˼. Maa vataravata, ekaa viraqaa vai haikaravata, ekaa vi haikava vi haikava te una haikavaqaima vaivo.
13 Te purumakau qora vira mati naunarae? Te memeraa naare naunarae? Kiavuve.
14 Te nai virini kantaaqaini vaura Variqaukama vauro. ˻Ni avu aato qora avu aatoqai vaira kaara ne quara aantau iha quara timite variara kia ti virara hantuqa harivo.˼ Ne maa haikararaqai irihama ti quahama timitaate: Ne tiriara koqeve tivaqi vuate. Ne kauqu aiqiqaa aqukeha tiriara tivate uvara ˻kia qaqira karaiti,˼ vi uvara avataate.
15 Maaravano niqi qovaraiqiaina entara tiqai haaraate. Ne mintiaqi viqe te ni ruaruama nimitaari ne ti hutu tuaheraqi vivarave, tiro.
16 Viva minti tivakero Kotiva qora kaiqa vare variakara tiharo, ˻Ne qora kaiqa vare variara kaara˼ hauri ne nenta noqihai te tiva tauna uvara tivaqi vivorave. Ne unahaa tiha, Kotiva tinavu hampata vohaa vaiharo uva tiva taatautaira tenavu iriqi vi vaunarave, ti variarave.
17 Te uva maara tiva taunarara kia ni antuqavano vaimanta ne ti uva qoririmake variarave.
18 Ne muara vaiinti taveha, vika tontiqi variarave. Naata vaati varaa okarara raqake variaka, ne vikara quaheha variarave.
19 Ne nenta noqihai qora kaiqa vareraraqai ti variarave. Ni maaqirivano una uvaqai ti vairave.
20 Ne nenta qata vakaaqaa una uva oqikeha ti variarave. Ne nenta nora vira maaquara tauvaqa vauraa uvaqai ti variarave.
